श्रीनगरच्या हरि सिंह हाय स्ट्रीट भागात रविवारी दहशतवाद्यांनी सुरक्षा दलांवर ग्रेनेड हल्ला केला. यामध्ये एका व्यक्तिचा मृत्यू झाला असून, जवळपास २० जण जखमी झाले आहेत. श्रीनगर पोलिसांनी दिलेल्या माहितीनुसार संध्याकाळी सव्वाचार वाजता हा हल्ला झाला आहे. हल्ल्यामध्ये जखमी झालेल्या सर्वांना रुग्णालयात दाखल करण्यात आलं असून, सुरक्षा दलांनी परिसरात कडक बंदोबस्तात शोध मोहीम सुरु केली आहे.

श्रीनगरमधील या ग्रेनेड हल्ल्यामागे नेमका कोणत्या दहशतवादी संघटनेचा हात आहे, हे अद्याप समजलेलं नाही. सुरक्षा दलांनी परिसरात शोध मोहीम सुरू केली आहे. श्रीनगरमधील अमृता कादल मार्केटमध्ये हा हल्ला झाला. यावेळी तिथे मोठी गर्दी होती. दहशतवाद्यांविरोधात सुरक्षा दलांकडून सुरू असलेल्या कारवाईदरम्यान श्रीनगरमध्ये हा हल्ला झाला आहे. गेल्या काही महिन्यांत जम्मू-काश्मीर पोलीस आणि निमलष्करी दलांनी अनेक मोठ्या दहशतवाद्यांचा खात्मा केला आहे.