नवी दिल्ली : दिल्लीमध्ये बसलेले लोक जम्मू-काश्मीरचा प्रयोगशाळेसारखा वापर करत आहेत, असा आरोप पिपल्स डेमोक्रेटिक पार्टीच्या (पीडीपी) प्रमुख मेहबुबा मुफ्ती यांनी केंद्रातील भाजप सरकारवर केला आहे. पत्रकार परिषदेत त्या बोलत होत्या.

मुफ्ती म्हणाल्या, जे दिल्लीत बसले आहेत ते जम्मू आणि काश्मीरचा प्रयोगशाळा म्हणून वापर करत असून इथे प्रयोग केले जात आहेत. नेहरु, वाजपेयी यांसारख्या नेत्यांकडे जम्मू आणि काश्मीरसाठी एक दूरदृष्टी होती. पण मोदी सरकार हिंदू आणि मुस्लिमांमध्ये फूट पाडण्याचा प्रयत्न करत आहे. कारण सरदार आता खलिस्तानी बनलेत, मुस्लिम पाकिस्तानी आणि भाजप हिंदुस्तानी झालाय.

जम्मू-काश्मीरवर मर्यादा घालण्याचं काम अडमुठेपणानं केलं जात आहे. शैक्षणिक संस्थांची नाव बदलण्याच काम सुरु आहे. पण नावं बदलून मुलांना रोजगार मिळणार नाहीए. केंद्र सरकार तालिबान, अफगाणिस्तानबाबत बोलतंय पण शेतकऱ्यांबाबत आणि रोजगाराबाबत बोलायला तयार नाही, असंही मुफ्ती यांनी म्हटलं आहे.