लखनौ : येथील एका प्रसिद्ध हिंदी दैनिकातील छायाचित्रकाराचा आणि त्याच्या भावाचा त्यांच्या शेजाऱ्यांनी सहारणपूरमध्ये गोळ्या घालून खून केला. शेण टाकण्यावरून झालेल्या वादानंतर ही घटना घडली. या घटनेवरून विरोधकांनी राज्य सरकारवर टीका केली आहे. 

आशिष (वय 23) असे या छायाचित्रकाराचे नाव असून, आशुतोष (वय 19) असे त्यांच्या भावाचे नाव आहे. गाईचे शेण टाकण्यावरून या भावांचा त्यांचे शेजारी महिपाल सैनी यांच्याशी वाद झाला. वाद वाढत गेल्यानंतर चिडलेल्या महिपाल आणि त्यांच्या मुलांनी आशिष यांच्या घरात घुसून त्यांना आणि त्यांच्या भावाला गोळ्या घातल्या. या दोघांना रुग्णालयात नेले असता त्यांचा मृत्यू झाल्याचे डॉक्‍टरांनी घोषित केले.

मुख्यमंत्री योगी आदित्यनाथ यांनी या घटनेची दखल घेत दोषींना योग्य शासन होईल, अशी ग्वाही दिली. तसेच, मृतांच्या नातेवाइकांना प्रत्येकी पाच लाख रुपयांची मदत जाहीर केली आहे. विरोधकांनी मात्र ही घटना म्हणजे राज्यातील कायदा आणि सुव्यवस्था ढासळल्याचे निदर्शक असल्याचे म्हटले आहे.