गुजरातच्या सुरतमध्ये एका पत्रकाराला चौघांनी भररस्त्यात आडवून धारदार शस्त्रांनी भोसकलंय. ३७ वर्षांच्या या पत्रकाराचा मृत्यू झाला आहे. चौघांनी त्यांच्या गाडीला धडक दिली. आणि वार केले. यावेळी पठाण यांच्यासोबत त्यांची पत्नी आणि तीन मुलीही होत्या. (Journalist Killed in Surat)

पठाण त्याच्या पत्नीसोबत लहान मुलींना घेऊन शहापूर वड येथील नातेवाईकांना भेटण्यासाठी निघाले होते. ते जिलानी पूल ओलांडत असताना एका कारने दुचाकीला मागून धडक दिली आणि कुटुंब रस्त्यावर पडले. चौघांनी तात्काळ गाडीतून खाली उतरून पठाण यांच्या पाठीत चाकूने वार केले. (Surat Journalist Murder)

ज्या दिवशी पठाण यांची हत्या झाली, त्याच दिवशी पोलीस अधीक्षक शरद सिंघल यांनी पत्रकारांना माहिती दिली होती. सोशल मीडियावर शहरात गुन्हेगारी वाढल्याची माहिती परसवण्यात येत असली, तरीही हत्यांचं प्रमाण कमी झाल्याचं त्यांनी सांगितलं. जानेवारी 2022 मध्ये सुरत शहरात मागील वर्षीच्या तुलनेत फक्त दोन खुनाचे गुन्हे दाखल झाल्याची माहिती त्यांनी दिली.

या हत्येप्रकऱणी रांदेर पोलिसात तक्रार नोंदवण्यात आली आहे. प्राथमिक तपासात पठाण यांची हत्या वैयक्तिक वैमनस्यातून झाल्याचा अंदाज आहे. कुटुंबातील सदस्यांनी चार संशयितांची नावं दिल्याची माहिती एका अधिकाऱ्याने दिली.