नवी दिल्ली - अदानी एंटरप्रायझेस प्रकरणाची चौकशी करण्यासाठी संयुक्त संसदीय समिती (जेपीसी) स्थापन करण्यात यावी किंवा सर्वोच्च न्यायालयाच्या देखरेखीखाली चौकशी करण्यात यावी, अशी मागणी काँग्रेससह इतर विरोधी पक्षांनी गुरुवारी संसदेच्या दोन्ही सभागृहात केली. (Adani-Hindenburg news in Marathi)

अदानींसह विविध मुद्द्यांवर गदारोळ झाल्याने लोकसभा आणि राज्यसभेचे कामकाज दुपारी दोन वाजेपर्यंत तहकूब झाल्यानंतर राज्यसभेतील विरोधी पक्षनेते आणि काँग्रेसचे अध्यक्ष मल्लिकार्जुन खर्गे यांनी पत्रकारांशी बोलताना म्हणाले की, लोकांचे हित आणि एलआयसी, एसबीआयची गुंतवणूक लक्षात घेऊन आम्ही चर्चा करू इच्छित आहोत. अदानी एंटरप्रायझेसची चौकशी जेपीसी स्थापन करून करावी किंवा सर्वोच्च न्यायालयाच्या मुख्य न्यायमूर्तींच्या नेतृत्वाखाली त्याची चौकशी व्हावी, अशी आमची मागणी आहे. अनेक विरोधी पक्षनेत्यांच्या उपस्थितीत खर्गे म्हणाले की, एकदा चौकशी झाली की, अहवाल लोकांसमोर ठेवला पाहिजे जेणेकरून पारदर्शकता येईल आणि लोकांचा विश्वास असेल की त्यांचे पैसे वाचतील.

एलआयसी, एसबीआय आणि इतर सार्वजनिक संस्थांनी केलेल्या गुंतवणुकीची चौकशी करण्यासाठी संयुक्त विरोधकांची मागणी सरकारने मान्य न केल्याने संसदेच्या दोन्ही सभागृहांचे कामकाज आज दुपारी दोन वाजेपर्यंत तहकूब करण्यात आले, अशी माहिती काँग्रेसचे सरचिटणीस जयराम रमेश यांनी दिली.