नवी दिल्ली - दिल्लीच्या कुतबमिनार परिसरात पूजाअर्चा करण्यास परवानगी देण्याची मागणी करणाऱया याचिकेवर साकेत न्यायालय येत्या 9 जून रोजी निकाल देणार आहे. मात्र 'जेव्हापासून या वास्तूचा ताबा आमच्याकडे आला तेव्हापासून येथे मंदिरे तोडून मीनार किंवा मशीद बनविल्याचा पुरावा अद्याप मिळालेला नाही,' असे भारतीय पुरातत्व सर्वेक्षण विभागाने (एएसआय) आज झालेल्या सुनावणीत स्पष्ट केले. येथे पूजेचा अधिकार देण्याची मागणी सत्र न्यायालयाने आधीच फेटाळून लावली आहे. तो निकाल योग्य होता असे एएसआयच्या वकीलांनी सांगितले.

येथील मंदिरे तोडून कुतुबशहाने कुतुबमीनार उभारला व त्यामुळे येथे पूजाअर्चा करण्यास परवानगी द्यावी, या हिंदू पक्षाच्या दाव्यावर न्यायालयाने, एक संरक्षित स्मारक पूजास्थळात परावर्तीत करण्याची परवानगी तुम्ही मागत आहात का ? जर 800 वर्षे येथे पूजा झालेली नाही तर तुम्ही हे ठिकाण का बदलवू इच्छिता? तुम्ही जो पूजेचा अधिकार मागत आहात तो कसा मिळालेला आहे ? हा मौलिक अधिकार आहे का घटनादत्त अधिकार? त्यावर हिंदू पक्षाच्या वकीलांनी सांगितले की घटनेच्या कलम 25 नुसार धर्मपालनाचा अधिकार प्रत्येक भारतीयाला मिळाला आहे. मंदिरे तोडून बनविलेल्या वास्तूला मशीद म्हणणे योग्य आहे काय ? तेथे नमाज अदा केली जात नाही. देशात अनेक संरक्षित धार्मिक स्थळे आहेत जी पुरातत्व खात्याच्या ताब्यात आहेत मग याचा अपवाद करण्याचे कारण नाही.