नवी दिल्ली : केंद्रीय मंत्री ज्योतिरादित्य शिंदे यांचा एक व्हिडिओ सध्या सोशल मीडियावर खूपच व्हायरल झाला आहे. या व्हिडिओत असं दिसून आलं की, त्यांनी स्वतःच्या तोंडावर लावलेला मास्क काढून दुसऱ्या व्यक्तीच्या तोंडावर लावला. त्यांच्या या कृतीमुळं त्यांच्यावर मोठी टीका होत आहे.

एका कार्यक्रमात ज्योतिरादित्य शिंदे उपस्थित होते. यावेळी ग्वाल्हेरचे माजी खासादर अरुण मिश्रा यांनी देखील या कार्यक्रमाला उपस्थिती लावली होती. दरम्यान, शिंदे यांनी आपल्या तोंडावरचा मास्क काढला आणि तो मिश्रा यांच्या तोंडावर लावला. त्याचवेळी एकानं हे दृश्य मोबाईलच्या कॅमेरॅत चित्रीत केलं. त्यानंतर हा व्हिडिओ प्रचंड व्हायरल झाला.

हा व्हिडिओ व्हायरल झाल्यानंतर ज्योतिरादित्य शिंदे यांचे सहकारी गोविंद यांनी स्पष्टीकरण दिलं. ते म्हणाले, "या कार्यक्रमात अरुण मिश्रा यांनी तोंडावर मास्क लावलेला नव्हता. पण शिंदे यांनी आपल्या तोंडावर दोन मास्क लावले होते. त्यामुळे त्यांनी तत्काळ आपल्या तोंडावरचा एक मास्क काढून तो मिश्रा यांच्या तोंडावर लावला. यावेळी शिंदे यांच्या तोंडावर N95 मास्क लावलेला होता. शिंदे हे कायम दोन मास्क वापरत असतात. विशेषतः सार्वजनिक कार्यक्रमात ते N95 मास्क वापरतात. त्यावर ते सर्जिकल मास्क लावतात. कोरोनापासून वाचण्यासाठी दोन मास्क लावणं योग्य असल्याचं तज्ज्ञ सांगतात"

दरम्यान, हा व्हिडिओ समोर आल्यानंतर काँग्रेसने थेट केंद्र सरकार हल्लाबोल केला. काँग्रेसनं म्हटलं की, "भाजपकडून राज्यांमध्ये सभा आणि यात्रा काढताना करोडो रुपये खर्च केले जातात. पण आपल्या पक्षांच्या लोकांना मास्क दिले जात नाहीत. अशा कार्यक्रमांमध्ये सर्वजण मास्क वापरत आहेत की नाही, हे सरकारने बंधनकारक केलं पाहिजे"