नवी दिल्ली : ‘‘माता काली ही माझ्यासाठी मांस व मद्य ग्रहण करणारी देवी आहे,’ असे विधान करून तृणमूल काँग्रेसच्या खासदार महुआ मोईत्रा यांनी काली’ या माहितीपटाच्या पोस्टरवरून सुरू झालेल्या वादात उडी घेतली आहे. चित्रपट निर्मात्या लीना मणिमेकलाई यांच्या ‘काली’ या माहितीपटाच्या पोस्टरवर कालीमाता सिगारेट ओढताना दाखविली आहे. यामुळे देशभरात संताप व्यक्त होत असतानाच महुआ मोईत्रा यांनी ‘काली मातेला मी मांस व मद्य ग्रहण करणाऱ्या देवीच्या रूपात पाहते,’ असे सांगत मणिमेकलाई यांची बाजू घेतली.

‘आपापल्या पद्धतीने देवतेचे चित्र रंगविण्याचा आणि तिचे पूजन करण्याचे स्वातंत्र्य प्रत्येकाला आहे. देवदेवतांना व्हिस्कीचा नैवेद्य दाखविण्याची प्रथाही काही ठिकाणी आहे. हे ईश्‍वरनिंदा ठरू शकते,’असेही त्या म्हणाल्या. एका वृत्तवाहिनीवरील कार्यक्रमात त्या बोलताना मोईत्रा म्हणाल्या, की तुम्ही सिक्कीमला गेलात तर तेथे काली मातेला व्हिस्की देण्याची प्रथा असल्याचे दिसेल तर उत्तर प्रदेशात गेला आणि सांगितले की तुम्ही काली मातेला प्रसादात व्हिस्की ठेवल्याचे सांगितले तर तेथे याला ईश्‍वराची निंदा केली असे म्हटले जाईल.

फासावर लटकवायला हवे

दरम्यान, सिगारेट ओढणारी व हातात समलैंगिक समूहाचा झेंडा घेतल्याचे देवीचे रूप सादर करून हिंदूंचा अपमान करणाऱ्यांना फासावर लटकवायला हवे किंवा गोळ्या घालून ठार मारायला हवे, असे आवाहन करीत कर्नाटकमधील भाजपचे नेते के. एस. ईश्‍वरप्पा यांनी केले. कालीमातेचा अवमान केल्याने चित्रपट निर्मात्या लीना मणीमेकलाई यांच्यावर कठोर कारवाई करण्याचीही मागणी त्यांनी केली. ‘‘काली माता हे आमच्यासाठी श्रद्धेचे केंद्र आहे. ती म्हणजे शक्तीचे रूप आहे. भारतीय संस्कृतीचे ती प्रतीक आहे. अशा काली मातेचे सिगारेट ओढतानाचे पोस्टर प्रकाशित केल्याने देशभरातील हिंदू व्यक्ती संतप्त झाले आहेत. भाजपच्या नुपूर शर्मा यांनी प्रेषित महंमद यांच्याविषयी केलेल्या वक्तव्याचा जगभरातील मुस्लिम समाज निषेध करीत आहे. त्याचप्रमाणे आमच्या देवदेवतांच्या अपमानाविरोधात आम्हीसुद्धा आवाज उठवू, ’’ असे ईश्‍वरप्पा म्हणाले.