पंतप्रधान नरेंद्र मोदी यांच्या नेतृत्वाखालील एनडीए सरकारच्या मंत्रिमंडळाचा बुधवारी विस्तार होण्याची शक्यता वर्तवण्यात येत आहे. या मंत्रिमंडळ विस्तारात महाराष्ट्राच्या पदरी दोन मंत्रिपदं जवळपास निश्चित झाली आहे. खासदार नारायण राणे आणि कपिल पाटील यांना दिल्लीवरुन तातडीनं फोन आल्याची माहिती मिळाली आहे.

सध्या महाराष्ट्रातून नितीन गडकरी, प्रकाश जावडेकर, पीयूष गोयल हे तीन केंद्रीय मंत्रिपद सांभाळत आहेत. तसेच, रामदास आठवले, संजय धोत्रे आणि रावसाहेब दानवे हे तिघे राज्यमंत्रिपदाची जबाबदारी सांभाळत आहेत. सध्या महाराष्ट्रात सहा केंद्रीय मंत्रिपदं आहेत. यामध्ये आणखी दोन मंत्रिपदाची भर पडणार हे निश्चित झालं आहे. नारायण राणे आणि कपिल पाटील यांना केंद्रीय मंत्रिपद मिळणार की राज्यमंत्रिपदाची जबाबदारी, हे मंत्रिमंडळ विस्तारानंतरच समोर येईल.

राणे आणि पाटील यांचा मंत्रिमंडळात समावेश झाल्यास महाराष्ट्रात शिवसेनेविरोधात भाजप अधिक आक्रमक होण्याची शक्यता मानली जाते. कपिल पाटील यांच्यामुळे आगरी समाजाला मंत्रिमंडळात प्रतिनिधित्व मिळू शकेल. आगामी काळात होणाऱ्या मुंबई आणि केडीएमसी महानगरपालिकेच्या दृष्टीने या दोन नेत्यांना मंत्रिमंडळात स्थान दिल्याचं बोललं जात आहे. नंदुरबारच्या खासदार हिना गावित, माढाचे खासदार रणजीत नाईक-निंबाळकर, बीडच्या खासदार प्रीतम मुंडे आणि राज्यसभेचे खासदार भागवत कराड यांच्याही नावाची चर्चा होत आहे. मात्र, यांना अद्याप दिल्लीवरुन बोलवणं आल्याची कोणतीही माहिती समोर आली नाही. किंवा यापैकी कोणताही नेता दिल्लीत दाखल झाल्याचं वृत्त नाही.