बंगळूर - पत्रकार गौरी लंकेश यांच्या हत्येनंतर प्रा. के. एस. भगवान यांची हत्या करण्याचा कट रचण्यात आल्याचे यापूर्वीच उघडकीस आले होते. संशयितांनी बेळगाव व महाराष्ट्रातील सातारा येथे एकत्र येऊन प्रा. भगवान यांच्या कटाची रूपरेषा निश्‍चित केल्याचे उघड झाले आहे. याप्रकरणी गौरी लंकेश हत्या प्रकरणातील अमोल काळे, के. टी. नवीनकुमारसह पाच जणांविरुद्ध ७०० पानी आरोपपत्र दाखल केले आहे. उप्पार पेठ पोलिस प्रकरणाची चौकशी करीत आहेत.

उप्पार पेठ पोलिसांनी बंगळूर येथील प्रथम एसीएमएम न्यायालयात आरोपपत्र दाखल केले आहे. पाचही संशयितांनी बेळगाव व महाराष्ट्रातील सातारा या ठिकाणी बैठका घेऊन हत्येचा कट आखल्याचे आरोपपत्रात म्हटले आहे.

अमोल काळे (३९), के. टी. नवीनकुमार (३७), सुजितकुमार (३७), मनोहर यडगे (२८) यांच्याविरुद्ध आरोपपत्र दाखल केले आहे. आरोपपत्रात सर्व संशयितांच्या योजनांचे विवरण केले आहे. न्यायवैधक प्रयोगशाळेचा अहवालही सोबत जोडण्यात आला आहे. या प्रकरणात ७ जणांना अटक केली होती, परंतु केवळ ५ जणांविरुध्द आरोपपत्र दाखल करण्यात आले.

गौरी लंकेश हत्याप्रकरणाची चौकशी करणाऱ्या विशेष तपास पथकाने (एसआयटी) के. टी. नवीनकुमार याच्या दूरध्वनावरील कॉल्सची माहिती गोळा केली आहे. त्यातून के. एस. भगवान यांच्या हत्येचा कट रचल्याचे उघड झाले. के. टी. नवीनकुमार व सुजितकुमार ऊर्फ प्रवीण यांच्या संभाषणाची माहिती एसआयटीने गोळा केल्यानंतर के. टी. नवीनकुमार यास अटक केली होती.

पाळतीसाठी एकाची नेमणूक
बेळगाव व सातारा येथे पाचही आरोपींनी एकत्र येऊन प्रा. भगवान यांच्या हत्येचा कट आखला. जानेवारी २०१८ मध्ये चामराजनगरच्या गुंडल जंगल प्रदेशातही सर्वांनी बैठक घेऊन चर्चा केल्याचे उघड झाले आहे. म्हैसूर येथील के. एस. भगवान यांच्या निवासस्थानाजवळ संशयितांनी एका व्यक्तीची नेमणूक केली होती. त्यांच्या घराजवळ किती सीसीटीव्ही आहेत, वसाहतीतील एकंदर परिस्थिती कशी आहे, यासंबंधी ही व्यक्ती माहिती गोळा करीत होती.