Karnataka Election 2023 : कर्नाटकचे माजी मुख्यमंत्री आणि नाराज भाजप नेते जगदीश शेट्टर (Jagdish Shettar) यांनी 10 मे रोजी होणाऱ्या विधानसभा निवडणुकीसाठी उमेदवारांची तिसरी यादी जाहीर करण्यासाठी शनिवार (15 एप्रिल) पर्यंत भाजपला 'अल्टिमेटम' दिलाय.

भाजपनं आतापर्यंत उमेदवारांची दुसरी यादी जाहीर केली आहे. पक्षानं 224 पैकी 213 नावं जाहीर केली असून 11 नावांची घोषणा होणं बाकी आहे.

त्याचवेळी जगदीश शेट्टर यांना निवडणूक लढविण्याबाबत विचारलं असता, त्यांनी समर्थकांशी बोलून निर्णय घेणार असल्याचं सांगितलं. भाजप नेत्यांची भेट घेतली असता त्यांनी सकारात्मक प्रतिसाद दिल्याचंही बोललं जात आहे. निर्णयासाठी वरिष्ठांशी चर्चा करावी लागेल, असंही त्यांनी सांगितलंय.

पक्षानं माझा अपमान केला आहे. भाजपनं (BJP) यादी जाहीर न केल्यास पुढचं पाऊल उचलू, असंही त्यांनी स्पष्ट केलंय. भाजप अध्यक्ष जेपी नड्डा (JP Nadda) यांच्या भेटीतही त्यांनी असंच म्हटलं होतं की, ते आणखी दोन दिवस वाट पाहतील.

दुसरीकडं, हुबळी-धारवाड महानगरपालिकेच्या 16 भाजप सदस्यांनी शेट्टर यांना तिकीट जाहीर करण्यास विलंब केल्याच्या निषेधार्थ पक्षाचे प्रदेश प्रमुख नलिनकुमार कटील यांच्याकडं सामूहिक राजीनामे सुपूर्द केले आहेत. भाजपनं 189 उमेदवारांची पहिली आणि 23 उमेदवारांची दुसरी यादी जाहीर केल्यामुळं अनेक नेते नाराज आहेत.