Karnataka Assembly Election 2023 : कर्नाटक विधानसभा निवडणुकीची रणधुमाळी सुरु झाली आहे. कर्नाटकात एकाच टप्प्यात निवडणूक होणार आहे. कर्नाटकात 10 मे रोजी मतदान होणार आहे. तर, 13 मे रोजी निवडणुकीचा निकाल लागणार आहे.

कर्नाटक विधानसभेच्या 224 जागांसाठी निवडणुका होणार आहेत. कर्नाटकात सध्या भाजपकडं 117, काँग्रेसकडं 69, जेडीएसकडं 32 आणि इतरांकडं सहा जागा आहेत. आता पुन्हा भाजप सत्तेवर येणार का? या प्रश्नाचं उत्तर 13 मे रोजी मिळणार आहे.

याचदरम्यान, आता एक महत्वाची बातमी समोर येत आहे. पंतप्रधान नरेंद्र मोदी (Narendra Modi) यांनी कर्नाटकचे माजी मंत्री आणि भाजप नेते ईश्वरप्पा (Eshwarappa) यांच्याशी फोनवरून चर्चा केली आहे. याचा एक व्हिडिओ भाजप नेत्यानं शेअर केलाय.

भाजप नेत्यानं यावेळी निवडणूक न लढवण्याची घोषणा केली आहे. रिपोर्ट्सनुसार, आपल्या मुलाला तिकीट न मिळाल्यामुळं ते नाराज होते. मात्र, पंतप्रधान मोदींशी झालेल्या संवादानंतर त्यांनी राज्यात भाजपच्या विजयासाठी एकदिलानं काम करण्याची ग्वाही दिलीये. आम्ही जिंकू, फक्त तुमच्या आशीर्वादाची गरज असल्याचं त्यांनी पंतप्रधानांना सांगितलंय. त्यामुळं ईश्वरप्पांची नाराजी दूर झाल्याचं बोललं जात आहे.