बंगळूर : येत्या २०२४ च्या लोकसभा निवडणुकीसाठी (Loksabha Election) कर्नाटकमधील धजद सोबत युती करण्याबाबत अजूनही चर्चा सुरू आहे. केंद्रीय नेते यावर अंतिम निर्णय घेतील, असे भाजपचे ज्येष्ठ नेते बी. एस. येडियुराप्पा (BS Yediyurappa) यांनी बुधवारी सांगितले.

पंतप्रधान नरेंद्र मोदी (Narendra Modi), केंद्रीय गृहमंत्री अमित शहा आणि पक्षाचे केंद्रीय नेतृत्व युतीबाबत निर्णय घेतील. जागावाटपाचा निर्णय हा केंद्रीय नेत्यांवर सोडला आहे. येडियुराप्पा २०२४ च्या लोकसभा निवडणूक तयारीचा आढावा घेण्यासाठी केंद्रीय निवडणूक समितीच्या बैठकीत उपस्थित राहण्यासाठी दिल्लीत आहेत.

लोकसभा निवडणुकीत राज्यात २५-२६ जागा जिंकण्याचे उद्दिष्ट आहे आणि त्यासाठी राज्यभर जिल्हा कार्यकर्त्यांची बैठक घेतली जाईल. लोकसभा निवडणुकीसाठी विरोधकांनी ‘इंडिया’ आघाडी स्थापन केल्याबद्दल ते म्हणाले, ‘मोदींसमोर ते शून्य आहेत. मागीलवेळी मिळाले होते तेवढ्याच जागा २०२४ मध्ये मिळतील. मोदी पुन्हा पंतप्रधान होतील.’