Shocking Poisoning Attempt in Karnataka School: कर्नाटकातील बेळगाव जिल्ह्यातील एका सरकारी शाळेतील मुस्लिम मुख्यध्यापकास पदावरून हटवण्यासाठी, कथितरित्या पाण्याच्या टाकीत विषारी रसायन मिसळले गेल्याचे समोर आले आहे. १४ जुलै रोजी घडलेल्या या घटनेप्रकरणी तीन जणांना अटक केली गेली आहे. ज्यामध्ये श्री राम सेना नावाच्या एका उजव्या विचारसणीच्या संघटनेशी निगडीत असलेल्या स्थानिक नेत्याचा समावेश असल्याचे बोलले जात आहे. विशेष म्हणजे हे कृत्य घडवण्यासाठी शाळेतील विद्यार्थ्याला हाताशी घेण्यात आल्याचंही समोर येत आहे.

याबाबत पोलिसांनी दिलेल्या माहितीनुसार, आरोपींचा उद्देश मुख्यध्यापक सुलेमान गोरिनाइक जे मागील १३ वर्षांपासून हुलिकट्टी येथील सरकारी लोअर प्राइमरी स्कूलमध्ये कार्यरत आहेत, यांच्या सभोवताली दहशतीचे आणि संशयाचे वातावरण निर्माण करण्याचा होता. पोलिसांनी सांगितले की, कथितरित्या या मुख्यध्यापकाची प्रतिमा डागळणे आणि त्यांची बदली करण्यासाठी हा कट रचला गेला होता.

शाळेतील पिण्याच्या पाण्याच्या टाकीतल पाणी पिल्याने जवळपास १२ विद्यार्थी आजारी पडले होते. तशी तर ही लक्षणं जीवघेणी नव्हती, परंतु शालेय प्रशासन आणि पालकांमध्ये चिंतेचे वातावरण निर्माण करण्यासाठी पुरेशी होती. आरोग्य अधिकाऱ्यांनी पुष्टी केली आहे की, मुलांवर तत्काळ उपचार केले गेले आहेत आणि आता ते ठीक आहेत.

याशिवाय पोलिसांना आढळले की, विषारी रसायन पाण्यात मिसळण्याची ही घटना इयत्ता पाचवीतील विद्यार्थ्यांमार्फत केली गेली होती. विद्यार्थ्याने सांगितले की, त्याला एका हानिकारक रसायनाने भरलेली बाटली दिली गेली होती आणि त्याला ते पिण्याच्या पाण्याच्या टाकीत मिसळण्यास सांगितले होते. तर एका वृत्तसंस्थेने दिलेल्या माहितीनुसार ती बाटली देणाऱ्याची ओळख कृष्ण मदार अशी समोर आली आहे.