Karnataka Politics : मुख्यमंत्री सिद्धरामय्या (CM Siddaramaiah) यांचे निकटवर्तीय म्हणून ओळखले जाणारे भाजपचे माजी मंत्री एस. टी. सोमशेखर यांनी सिद्धरामय्यांची भेट घेऊन चर्चा केली. त्यानंतर माजी मंत्री शिवराम हेब्बार यांनीही सिद्धरामय्या यांची भेट घेऊन गुप्त चर्चा केली.

त्यामुळे राजकीय वर्तुळात हा चर्चेचा विषय ठरला आहे. राज्यात ऑपरेशन कमळनंतर (Operation Lotus) सिद्धरामय्या यांच्या जवळच्या वर्तुळात ओळखले जाणारे शिवराम हेब्बार यांनी भाजपमध्ये प्रवेश केला. ते १७ आमदारांपैकी ते एक होते.

भाजपचे काही आमदार पुन्हा काँग्रेसमध्ये (Congress) येणार असल्याच्या चर्चा आतापासूनच सुरू आहेत. १७ आमदारांपैकी माजी आमदार एच. विश्वनाथ यांनी आधीच भाजपला निरोप दिला आहे. मात्र, पक्षांतराबाबत माजी मंत्री एस. टी. सोमशेखर आणि शिवराम हेब्बार यांनी खंडन केले आहे.

दोन्ही नेत्यांनी सिद्धरामय्या यांची भेट घेऊन चर्चा केल्यानंतर उत्सुकता वाढली आहे. सोमशेखर मुख्यमंत्र्यांच्या भेटीचे कारण देताना मतदारसंघातील विकासकामांचे निमित्त सांगत आहेत. शिवराम हेब्बारही त्यांच्या भेटीमागे असेच कारण देत आहेत.