हावेरी (कर्नाटक) : कर्नाटकात यात्रेकरूंच्या बसचा मोठा अपघात झाला आहे. हावेरी जिल्ह्यात ही मोठी दुर्घटना घडली आहे. येथील ब्याडगी तालुक्यात शुक्रवारी पहाटे मिनी बस उभ्या असलेल्या ट्रकला धडकून झालेल्या अपघातात 13 जण ठार, तर दोन जण गंभीर जखमी झाल्याची माहिती मिळत आहे.

हे सर्वजण तीर्थयात्रा करून परतत होते. पोलिसांनी सांगितलं की, पीडित शिवमोग्गा येथील रहिवासी आहेत. ते बेळगाव जिल्ह्यातील सौंदत्ती येथून यल्लम्मा देवीचं दर्शन घेऊन परतताना ही मोठी दुर्घटना घडलीये.

दरम्यान, जखमींना रुग्णालयात दाखल करण्यात आले असून त्यांची प्रकृती चिंताजनक असल्याचे सांगण्यात येत आहे. बस चालकाला झोप लागली होती, त्यामुळं हा अपघात झाल्याचा पोलिसांचा अंदाज आहे. पुढील तपास सुरू असल्याचेही पोलिसांनी सांगितले.