जम्मू-काश्मीरमधील कठुआमधील बदनोटा भागात दहशतवाद्यांनी पुन्हा एकदा घृणास्पद कृत्य केले आहे. येथे दहशतवाद्यांनी लष्कराच्या ताफ्यावर हल्ला केला. या हल्ल्यात भारतीय लष्कराचे ५ जवान शहीद झाले, तर ५ जवान अजूनही जखमी असल्याचे सांगण्यात येत आहे.

काश्मीर टायगर्स नावाच्या संघटनेने या हल्ल्याची जबाबदारी घेतली आहे. जम्मू-काश्मीरमधील कठुआ भागात काश्मीर टायगर्सच्या दहशतवाद्यांनी भारतीय लष्कराच्या ताफ्यावर हल्ला केला.

काश्मीर टायगर्स नावाच्या संघटनेने यासंदर्भात एक पत्रकही जारी केले आहे. पत्रक जारी करून त्यांनी या हल्ल्याची जबाबदारी स्वीकारली आहे.

"जम्मू-काश्मीरमधील कठुआ येथील बदनोटा भागात झालेल्या हल्ल्याची जबाबदारी काश्मीर टायगर्स घेत आहे. कठुआ मुजाहिद्दीनच्या बदनोटा भागात काश्मीर टायगर्सनी भारतीय सैन्याच्या ताफ्यावर हल्ला केला, या हल्ल्यात भारतीय सैन्याच्या दोन वाहनांना लक्ष्य करण्यात आले," असे पत्रकामध्ये सुरूवातीला म्हटले आहे.

यामध्ये पुढे लिहिले आहे की, "मुजाहिदीनचा हल्ला इतका भयंकर होता की, भारतीय सैन्याला हलण्याची संधीही मिळाली नाही आणि मुजाहिद्दीन सुखरूप बाहेर पडण्यात यशस्वी झाले. आतापर्यंतच्या वृत्तानुसार, या हल्ल्यात 7 सैनिक ठार झाले आणि 6 जखमी झाले भारत नेहमीप्रमाणे आपले नुकसान लपवण्याचा अयशस्वी प्रयत्न करत आहे, ज्याचा लवकरच पर्दाफाश होईल हा हल्ला म्हणजे 26 जून 2024 रोजी शहीद झालेल्या तीन मुजाहिद्दीनचा बदला आहे. आम्ही लवकरच आणखी विनाशकारी हल्ले सुरू करू."

दरम्यान कुलगाम जिल्ह्यात दोन वेगवेगळ्या चकमकीत मारले गेलेले सहा दहशतवादी हे स्थानिक असल्याचे स्पष्ट झाले आहे. याप्रकरणी पोलिसांनी सांगितले की दहशतवादी अनेक महिन्यांपासून चनीगाम आणि मोदेरगाम गावात अत्याधुनिक काँक्रीट बंकरमध्ये लपून बसले होते.

सुरक्षा दलांनी जम्मू-काश्मीरमधील दहशतवाद्यांच्या अड्ड्यांमधून एके 47 रायफल्स जप्त केल्या आहेत. एके 47 रायफल्स व्यतिरिक्त, चनीगाम येथील चकमकीच्या ठिकाणाहून एक शक्तिशाली इम्प्रोव्हाइज्ड एक्सप्लोसिव्ह डिव्हाइस (आयईडी) देखील जप्त करण्यात आला आहे.