नवी दिल्ली- सिक्किमचे मुख्यमंत्री प्रेम सिंह तमांग यांच्या पत्नी कृष्णा कुमारी यांनी आमदारकीचा राजीनामा दिला आहे. विशेष म्हणजे काही दिवसांपूर्वी तमांग यांनी मुख्यमंत्रीपदाची शपथ घेतली होती, त्यानंतर एका दिवसाने त्यांच्या पत्नी कृष्णा कुमारी यांनी पदाचा राजीनामा दिल्याने आश्चर्य व्यक्त केले जात आहे.

कृष्णा कुमारी यांनी विधानसभा निवडणुकीमध्ये सिक्किम डेमोक्रेटिक फ्रंटचे उमेदवार बिमल राय यांचा नामची-सिंघीथांग मतदारसंघातून पराभव केला होता. त्यांचा राजीनामा विधानसभा अध्यक्षांनी स्वीकारला देखील आहे. तमांग यांच्या सिक्किम क्रांतिकारी मोर्चाने विधानसभा निवडणुकीत ३२ पैकी ३१ जागा जिंकल्या होत्या. तमांग यांच्या पत्नी कृष्णा कुमारी पहिल्यांदाच विधानसभा निवडणूक लढवत होत्या.

कृष्णा कुमारी यांनी आपल्या मतदारसंघातील नागरिकांना पत्र लिहिले आहे. यात त्या म्हणाल्या आहेत की, त्यांनी पक्षाच्या निर्णयाचा सन्मान करून निवडणूक लढवली होती. ''मोठ्या दु:खी मनाने मी सांगत आहे की मी आमदारकीचा राजीनामा दिला आहे. मी कधीही विचार केला नव्हता की, मी इतक्या लवकर राजकारणात येईन. मी राजकारणाला नेहमी समाजकारण म्हणून पाहिलं आहे. पार्टी अध्यक्षांनी निवडणूक लढवण्याचा आदेश दिल्याने मी निवडणुकीच्या मैदानात उतरले होते.''

लोकांची सेवा करण्यासाठी मला कोणत्याही पदावर राहण्याची आवश्यकता नाही. मी माझ्या क्षमतेनुसार मदत करत आली आहे आणि करत राहणार आहे. मी आणि माननीय मुख्यमंत्री नामची सिंगिथांग मतदारसंघासाठी योग्य उमेदवार देऊ, जो लोकांची सेवा करेल, असं कृष्णा कुमारी म्हणाल्या आहेत. कृष्णा कुमारी यांनी यावेळी मुख्यमंत्री पती तमांग यांचे कौतुक देखील केले आहे. मला विश्वास आहे की, तमांग यांच्या नेतृत्त्वात सिक्किम प्रगती आणि विकास साध्य करेल, असं त्या म्हणाल्या.

पत्नीच्या या निर्णयानंतर तमांग यांनी देखील सोशल मीडियावर पोस्ट करत भाष्य केलं आहे. ते म्हणाले की, 'माझ्या पत्नीच्या राजीनाम्याच्या संदर्भात सिक्किमच्या जनतेला सांगू इच्छितो की, कृष्णा कुमारी यांनी पक्षाचे कल्याण आणि उद्देश यांची प्राथमिकता लक्षात घेऊन पक्षाच्या सर्वानुमते आमदारकीचा राजीनामा घेण्याचा निर्णय घेतलाय. मतदारसंघासाठी एका समर्पित उमेदवाराची निवड केली जाईल.'