प्रयागराज : कुंभ मेळा म्हणजे गर्दीचा महापूर.. म्हणूनच पंतप्रधान नरेंद्र मोदी यांच्या महत्त्वाकांक्षी 'स्वच्छ भारत' उपक्रमासाठीही कुंभ मेळ्याचे नियोजन महत्त्वाचे आहे. 'स्वच्छ कुंभ, सुरक्षित कुंभ' असे घोषवाक्‍यच यंदाच्या कुंभ मेळ्यासाठी तयार करण्यात आले आहे. 

कुंभ मेळ्यात होणारी गर्दी लक्षात घेता प्रशासनाने यंदा 1.22 लाख स्वच्छतागृहे उभारली आहेत. आजपासून (सोमवार) सुरवात झालेल्या कुंभ मेळ्याची समाप्ती 4 मार्च रोजी होणार आहे. यास देशविदेशातून लाखो भाविक येत असतात. या सर्वांच्या सोयीसाठी प्रशासनाने पावले उचलली आहेत. 

भाविकांच्या पिण्याच्या पाण्याचा प्रश्‍न सोडविण्यासाठी कुंभ मेळा आयोजकांनी ठिकठिकाणी 50 'आरओ' वॉटर एटीएम उभारली आहेत. तसेच, यंदाच्या मेळ्यात स्वच्छतेसाठी युद्धपातळीवर तयारी करण्यात आली आहे. 

रात्रीच्या कालावधीत वाहतुकीसाठी किंवा प्रवासासाठी अडथळा होऊ नये, यासाठी 40 हजारांहून अधिक पथदिवेही लावण्यात आले आहेत.