नवी दिल्ली : नवी दिल्ली : लखीमपूर खेरी प्रकरणात (lakhimpur kheri case) शेतकऱ्यांना कारने चिरडल्याच्या घटनेशी संबंधित अन्य चार आरोपींना यूपी पोलिसांनी अटक केलीय. यात भाजप नेते सुमित जयस्वाल (BJP leader sumit Jaiswal) यांचा समावेश आहे. जे घटनेच्या वेळी त्या एसयूव्हीमध्ये (SUV) कथितरित्या स्वार होते. सुमित जयस्वाल हे भाजपचे स्थानिक नेते आहेत. दरम्यान, सुमित जयस्वाल यांनी अज्ञात शेतकर्‍यांविरोधात एफआयआर (FIR) दाखल केला असून चालक, मित्र आणि दोन भाजपच्या कार्यकर्त्यांना मारेकऱ्यांनी मारहाण केल्याचा आरोप त्यांनी केलाय. या प्रकरणात केंद्रीय मंत्री अजय मिश्रा यांचा मुलगा आशिष मिश्राला (Ashish Mishra) आधीच अटक करण्यात आलीय.

लखीमपूर घटनेत 4 शेतकऱ्यांसह एक पत्रकार ठार झालाय. ही घटना 3 ऑक्टोबर रोजी लखीमपूर खेरी येथे घडली. त्यानंतर संपूर्ण देशात संतापाची लाट उसळलीय. सुमित जयस्वाल यांच्या व्यतिरिक्त शिशुपाल, नंदन सिंह बिष्ट आणि सत्य प्रकाश त्रिपाठी यांना लखीमपूर खेरी पोलीस (UP Police) आणि गुन्हे शाखेच्या टीमनं ताब्यात घेतलंय.

वरिष्ठ पोलीस अधिकारी प्रशांत कुमार यांनी सांगितलं, की सत्य प्रकाश त्रिपाठी यांच्याकडून रिव्हॉल्व्हर आणि तीन काडतुसे जप्त करण्यात आली आहेत. या प्रकरणी यूपी पोलिसांनी गृह राज्यमंत्री अजय मिश्रा यांचा मुलगा आशिष मिश्राला आधीच अटक केलीय. शेतकऱ्यांना चिरडल्याच्या घटनेचे अनेक व्हिडिओ सोशल मीडियावर व्हायरल झाले आहेत. यापैकी एका व्हिडिओत सुमित जयस्वाल हे एसयूव्हीच्या बाहेर पळताना दिसत आहेत. जयस्वालांच्या स्टेटमेंटच्या आधारे ओळख पटलीय. मात्र, सुमित यांनी हा आरोप फेटाळला आहे.