नवी दिल्ली - राजधानी दिल्ली आणि एनसीआरमध्ये अनेक ठिकाणी आज सकाळपासून अधूनमधून हलका पाऊस पडत आहे. हवामान खात्याच्या अंदाजानुसार पुढील 1-2 दिवस दिल्ली आणि आसपासच्या भागात हलका ते मध्यम पाऊस सुरू राहू शकतो. पावसामुळे दिल्लीत तीव्र थंडीची आणखी एक लाट येण्याचीही शक्यता आहे.

दिल्लीत कालपासूनच ढगाळ वातावरण आहे. कालही सूर्यदर्शन झाले नव्हते. आज पहाटेपासूनच काही भागांत हलका फुलका पाऊस पडत आहे.

भारतीय हवामान विभागाने सांगितले की पश्चिमी विक्षोभामुळे (वेस्टर्न डिस्टर्बन्स) उत्तर भारताच्या अनेक राज्यांत पावसाचा अंदाज आहे. पुढच्या काही दिवसात जम्मू आणि काश्मीर, हिमाचल प्रदेश , उत्तराखंडमधील बर्फवृष्टीचा जोरही वाढण्याचा अंदाज वर्तविण्यात आला आहे. साहजिकच या दिल्ली, हरियाना व पश्चिम उत्तर प्रदेशात तीव्र थंडीची आणखी एक लाट येण्याची शक्यता आहे.