Manish Sisodia News : दिल्लीचे माजी उपमुख्यमंत्री आणि दारू घोटाळ्यातील (Liquor Scam Case) आरोपी मनीष सिसोदिया यांची होळी तुरुंगात साजरी होणार आहे. त्यांच्या जामिनावर दिल्लीच्या राऊस अॅव्हेन्यू कोर्टात (Rouse Avenue Court) युक्तिवाद करण्यात आला.

दोन्ही बाजू ऐकून घेतल्यानंतर न्यायालयानं दोन दिवसांची कोठडी वाढवलीये. पुढील सुनावणी 10 मार्च रोजी होणार आहे. सीबीआयनं (CBI) न्यायालयाला सांगितलं की, 'आता आरोपींची समोरासमोर चौकशी करावी लागेल. अजून काही कागदपत्रं जप्त करायची आहेत, त्यामुळं 3 दिवसांची कोठडी देण्यात यावी.'

मनीष सिसोदिया यांना सीबीआयनं नुकतंच अबकारी धोरण घोटाळ्याप्रकरणी अटक केली होती. त्यानंतर सुप्रीम कोर्टानं सिसोदिया यांच्या याचिकेवर विचार करण्यास नकार दिला होता. 2021-22 मध्ये मद्य धोरण तयार करण्यात आणि अंमलबजावणीमध्ये भ्रष्टाचार केल्याप्रकरणी सीबीआयनं अटक केल्यानंतर सिसोदिया यांनी मंत्रिमंडळाचा राजीनामा दिला होता. या संपूर्ण प्रकरणात अरविंद केजरीवाल हे मुख्य आरोपी असल्याचा भाजपचा आरोप करत आहे.

सिसोदियांच्या कोर्टात हजेरीदरम्यान आम आदमी पक्षानं गोंधळ घालण्याचा प्रयत्न केला, परंतु पुरेशी सुरक्षा व्यवस्था करण्यात आली होती. आजचा दिवस केवळ मनीष सिसोदिया यांच्यासाठीच नाही, तर आम आदमी पार्टी आणि अरविंद केजरीवाल यांच्यासाठीही महत्त्वाचा मानला जात होता. मात्र, दोन्ही बाजू ऐकून घेतल्यानंतर न्यायालयानं दोन दिवसांची कोठडी वाढवली आहे.