नवी दिल्लीः लोकसभा निवडणूकीदरम्यान अमेठी मतदारसंघामधून काँग्रेसचे अध्यक्ष राहुल गांधी विरुद्ध केंद्रीय मंत्री स्मृती इराणी अशी लढत होणार आहे.

2014 मध्ये झालेल्या निवडणूकीदरम्यान राहुल गांधी यांनी स्मृती इराणी यांचा पराभव केला होता. दुसऱयांदा याच मतदारसंघामधून गांधी व इराणी पुन्हा आमने-सामने येणार आहेत. यामुळे मतदार कोणाच्या बाजूने कौल देणार हे महत्त्वाचे ठरणार आहे. काँग्रसचे अध्यक्षपद राहुल गांधी यांच्याकडे असल्यामुळे आगामी निवडणूक ही त्यांच्यासाठी महत्त्वाची ठरणार असून, दुसरीकडे स्मृती इराणी या केंद्रीय मंत्री आहेत. यामुळे दोघांसाठी ही निवडणूक प्रतिष्ठेची असणार आहे.

गेल्या निवडणुकीमध्ये राहुल गांधी यांना ४,०८,६५१ इतकी मते पडली होती; तर इराणी यांना ३,००,७४८ मते मिळाली होती. म्हणजेच, २०१४ च्या निवडणुकीत राहुल गांधींना १,०७,९०३ मतांनीच विजय मिळविता आला होता. २००९ च्या लोकसभा निवडणुकीत राहुल गांधी यांनी तब्बल ३,७०,१९८ मतांनी विजय मिळविला होता. त्या पार्श्वभूमीवर इराणी यांनी गेल्या निवडणुकीत गांधी यांचे मताधिक्य लक्षणीयरित्या कमी केले होते.

दरम्यान, देशभरातील विविध सभांदरम्यान गांधी व इराणी हे एकमेकांवर आरोप-प्रत्यारोपाच्या फैरी झाडताना पहायला मिळतात. मात्र, अमेठी मतदारसंघामधील मतदार कोणाला स्वीकारतात हे महत्त्वाचे ठरणार आहे.