Congress Candidate List : काँग्रेसने राज्यातील सात उमेदवारांची यादी जाहीर केली आहे. यामध्ये कोल्हापुरातून शाहू महाराज, पुण्यातून रवींद्र धंगेकर, सोलापुरातून प्रणिती शिंदे या नावांचा समावेश आहे.

या सात उमेदवारांच्या नावांची घोषणा

१. नंदुरबार- गोवाल पाडवी

२. अमरावती- बळवंत वानखेडे

३. नांदेड- वसंतराव चव्हाण

४. पुणे- रवींद्र धंगेकर

५. लातूर- डॉ. शिवाजीराव कळगे

६. सोलापूर- प्रणिती शिंदे

७. कोल्हापूर- शाहू महाराज छत्रपती

राज्यातील लोकसभेच्या ४८ जागांपैकी १८ जागांवर काँग्रेस आपले उमेदवार उभे करणार असल्याची माहिती येत आहे. दिल्लीमध्ये झालेल्या काँग्रेसच्या बैठकीत सात जणांची नावं फायनल झाली आहेत.

दरम्यान, ८ मार्च रोजी काँग्रेसने ३९ उमेदवारांची पहिली यादी जाहीर केली होती. यामध्ये छत्तीसगडमधून सहा, कर्नाटकातून सात, केरळमधून १६, लक्षद्वीपमधून एक, मेघालयातून दोन, नागालँडमधून एक, सिक्कीममधून एक, तेलंगणातून चार आणि त्रिपुरातून एक उमेदवार उभा करण्यात आला आहे.

माजी केंद्रीय गृहमंत्री सुशीलकुमार शिंदे यांनी राजकीय निवृत्ती घेतल्यानंतर आमदार प्रणिती शिंदे यांना देशाच्या राजकारणात संधी मिळेल, असा सर्वांनाच विश्वास होता. त्यानुसार आता काँग्रेसने जाहीर केलेल्या पहिल्याच यादीत आमदार प्रणिती शिंदेंचे नाव आले आहे. दरम्यान, उमेदवारी जाहीर होण्यापूर्वीच प्रणिती शिंदे यांनी मोहोळ, दक्षिण सोलापूर, अक्कलकोट, मंगळवेढा या तालुक्यांमध्ये दौरे करून छोट्या छोट्या सभा देखील घेऊन प्रचारात आघाडी मिळविली आहे.

पुण्याच्या जागेविषयी राज्यात उत्सुकता आहे. भाजपने मुरलीधर मोहोळ यांची उमेदवारी जाहीर केल्यानंतर काँग्रेसने रवींद्र धंगेकर यांना मैदानात उतरवले आहे. त्यामुळे यावेळची पुणे लोकसभेची चुरस रंगतदार होणार, यात शंकाच नाही.