'प्रेम' हे एका व्यक्तीला दुसऱ्या व्यक्तीशी जोडतं. यात ना वयाला महत्त्व आहे, ना कोणतंही बंधन. असाच काहीसा प्रकार उत्तर प्रदेशातील (Uttar Pradesh) बरेलीत (Bareilly) घडलाय. एका 40 वर्षीय व्यक्तीचं 24 वर्षीय तरुणीवर प्रेम झालं (Love Story) आणि दोघांनी घरातून पळून जाऊन लग्न केलंय. आता दोघांनीही पोलिसांकडं संरक्षणाची मागणीय केलीय. लग्नानंतर हे प्रेमीयुगल वरिष्ठ पोलीस अधीक्षक कार्यालयात पोहोचलं आणि त्यांनी पोलिसांकडं संरक्षण देण्याची मागणी केलीय. तसेच मुलीचे कुटुंबीय या लग्नाला विरोध करत असून आमच्या जीवाला धोका असल्याचं त्यांनी सांगितलंय.

बरेलीच्या फतेहगंज पश्चिम पोलीस स्टेशन (Fatehganj West Police Station) परिसरात राहणाऱ्या 40 वर्षीय जयवरी सिंहचे शेजारी राहणाऱ्या 24 वर्षीय तरुणीसोबत गेल्या 12 वर्षांपासून प्रेमसंबंध होते. दोघांचं घर शेजारी असल्यानं दोघांची भेट होऊ लागली आणि या भेटीचं रुपांतर प्रेमात झालं. प्रेयसीनं पोलिसांना सांगितलं की, जेव्हा ती प्रेमात पडली तेव्हा ती केवळ 12 वर्षांची होती.

प्रेमप्रकरणानंतर दोघांनी लग्न करण्याचा बेत आखला आणि 25 जानेवारी रोजी घरातून पळून जाऊन लग्न केलं. दोघांनाही आयुष्यभर सोबत राहायचं आहे, पण लग्नानंतर नातेवाईक दोघांच्याही जीवाचे शत्रू झाले आहेत. प्रेयसीनं वरिष्ठ पोलीस अधीक्षक कार्यालयाला लेखी तक्रार पत्र दिलं असून आपल्या जीवाला धोका असल्याचं कारण देत संरक्षण देण्याची मागणी केलीय. या प्रकरणी वरिष्ठ पोलीस अधीक्षक रोहित सिंह सजवान म्हणाले, हे प्रकरण मिटवण्याचा आमचा प्रयत्न सुरु आहे. दोघांच्याही कुटुंबीयांना पोलिस ठाण्यात बोलावलं जाईल.