हाथरस चेंगराचेंगरीच्या घटनेमुळे संपूर्ण देश हादरला आहे. प्रशासन आणि सत्संग आयोजकांच्या निष्काळजीपणाची सातत्याने चर्चा होत आहे. या सगळ्या दरम्यान सत्संग करणारा भोले बाबा उर्फ नारायण साकार हरी याच्याबाबत धक्कादायक खुलासा झाला आहे. पोलिसांच्या फोन कॉल डिटेल चेकमध्ये अनेक गोष्टी समोर आल्या आहेत. भोले बाबा कधी आणि कोणासोबत बोलला या संदर्भात एक मोठी बाब समोर आली आहे. दुपारी १.४० वाजता भोले बाबा घटनास्थळावरून निघून गेल्याचे सूत्रांचे म्हणणे आहे.
यानंतर तो सतत सत्संग आयोजक आणि इतर लोकांशी मोबाईल फोनवर बोलत होता. बाबाच्या फोनचे लोकेशन मैनपूरच्या आश्रमात दुपारी 3 ते 4:35 या वेळेत मिळाले. यावेळी तो 3 फोन नंबरवर बोलला होता.
मिळालेल्या माहितीनुसार, भोले बाबा 1:40 वाजता घटनास्थळावरून निघून गेला होता. पोलिसांनी सत्संग बाबाच्या मोबाईल फोनचे कॉल डिटेल्स तपासले असून त्यात अनेक बाबी समोर आल्या आहेत. सूत्रांनी दिलेल्या माहितीनुसार, बाबाच्या सत्संगाचे आयोजक देव प्रकाश मधुकर याचा 2:48 वाजता फोन आला होता. यामध्ये त्याला बहुधा चेंगराचेंगरीच्या घटनेची माहिती देण्यात आली होती. भोले बाबानी मधुकर याच्याशी 2 मिनिटे 17 सेकंद फोनवर चर्चा केली. या अपघातात 121 जणांना आपला जीव गमवावा लागला आहे. मुख्यमंत्री योगी आदित्यनाथ यांनी स्वतः घटनास्थळी भेट दिली.
4.35 नंतर बाबांचा फोन बंद झाला. बाबाच्या शोधात एकूण 8 ठिकाणी छापे टाकण्यात आले. यासोबतच बाबाचा शोध घेण्यासाठी ४० पोलिसांची स्वतंत्र टीम तयार करण्यात आली आहे. बाबा हरियाणा किंवा दिल्लीला पळून जाण्याच्या शक्यतेमुळे टोल प्लाझावरील फुटेजचीही छाननी केली जात आहे. भोले बाबा स्वतः जाटव समाजातून आलेले आहेत. उत्तर प्रदेश, राजस्थान आणि मध्य प्रदेशात त्याचे अनुयायी आहेत. असे म्हणतात की भोले बाबाचा एससी/एसटी आणि ओबीसी वर्गांमध्ये खोलवर प्रभाव आहे.
सत्संग निवेदक सूरज पाल उर्फ बाबा साकार हरी याचे जुने राजकीय संबंधही समोर आले आहेत. समाजवादी पक्षाचे अध्यक्ष अखिलेश यादव यांनी या बाबाच्या सत्संगाला हजेरी लावली, ज्याचा फोटो अखिलेश यांनी स्वतः शेअर केला आहे. गेल्या वर्षीही जानेवारी महिन्यात अखिलेश यांनी भोले बाबांच्या सत्संगाला हजेरी लावली होती आणि बाबाच्या गौरवाची प्रशंसा करणारी पोस्ट शेअर केली होती.
एटा, मैनपुरी, आग्रा, अलीगढ यांसारख्या भागातील जाटव व्होटबँकेत भोले बाबा तळागाळापर्यंत पोहोचल्याचे सांगितले जाते. या पार्श्वभूमीवर राजकीय पक्षांचे नेते त्याच्यासोबत स्टेज शेअर करत आहेत. बाबाच्या सूचनेवरून त्याचे अनुयायी नेत्यांना निवडणुकीत मदत करत असल्याचे सूत्रांचे म्हणणे आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.