नवी दिल्ली - छत्तीसगडमध्ये गाजत असलेल्या महादेव अ‍ॅपवरून आज पंतप्रधान नरेंद्र मोदी यांनी काँग्रेसवर हल्लाबोल केला. महादेव अ‍ॅपमधून छत्तीसगडच्या मुख्यमंत्र्यांना मिळत असलेल्या रक्कमेचा काही हिस्सा दिल्लीतील काँग्रेसच्या ज्येष्ठ नेत्यांकडे जात होता, असा आरोप पंतप्रधान नरेंद्र मोदी यांनी आज केला.

छत्तीसगडमधील मुंगली येथील जाहीरसभेत बोलताना काँग्रेसवर महादेव अ‍ॅप व इतर मुद्यावरून काँग्रेसला घेरण्याचा प्रयत्न केला. छत्तीसगडमध्ये डबल इंजिनचे सरकार नसल्याने अनेक योजनांचा फायदा छत्तीसगडच्या नागरिकांना मिळत नाही.

बघेल सरकारने केंद्र सरकारच्या अनेक योजना लागू केल्या नसल्याचा आरोप त्यांनी यावेळी केला. पंतप्रधानांनी मात्र आज बहुचर्चित महादेव अ‍ॅपवरून काँग्रेसला घेरण्याचा प्रयत्न केला. महादेव अ‍ॅपच्या मालकाकडून मुख्यमंत्री भूपेश बघेल यांना ५०८ कोटी रुपये मिळाल्याचा आरोप केला जात आहे. यावरून अनेकांची चौकशी सुरू आहे.

महादेव अ‍ॅपचा पैसा दिल्लीतील ज्येष्ठ नेत्यांना या पैशातील काही हिस्सा पाठविला जात होता. यावेळी पंतप्रधान यांनी काँग्रेसच्या पक्षश्रेष्ठींकडे अंगुलनिर्देश केला आहे. महादेव अॅप प्रकरणी आतापर्यंत कुणीही दिल्लीतील कनेक्शनवर चर्चा केली नव्हती. पंतप्रधान मोदी यांनी थेट गांधी कुटुंबाकडे या अ‍ॅपच्या काळ्या पैशाचे कनेक्शन दाखविला आहे.

ते पुन्हा येणार नाही: बघेल

पंतप्रधान मोदी यांच्या हल्ल्यानंतर मुख्यमंत्री भूपेश बघेल यांनी प्रत्युत्तर दिले आहे. निवडणुकीच्या प्रचारासाठी पंतप्रधान छत्तीसगडमध्ये येत आहे. निवडणूक संपल्यानंतर पंतप्रधान मोदी पुन्हा छत्तीसगडमध्ये दिसणार नाही. निवडणूक संपली की त्यांचे छत्तीसगडशी नाते संपून जाईल.

राज्याच्या संकटाच्या काळात ते आले होते का, कोरोनाच्या काळात ते आले होते का, असे प्रश्न विचारून मुख्यमंत्री बघेल यांनी पंतप्रधान केवळ निवडणुकीसाठी त्या त्या राज्यात फिरतात. त्यानंतर ते पुन्हा फिरकत नाही, असा टोला त्यांनी लगावला. गृहलक्ष्मी योजनेअंतर्गत महिलांना दरवर्षी १५ हजार रुपये देण्याची घोषणाही मुख्यमंत्री भूपेश बघेल यांनी यावेळी केली.