तृणमूल काँग्रेसच्या खासदार महुआ मोइत्रा यांच्या अडचणीत वाढ झाली आहे. दिल्ली पोलिसांनी त्यांच्यावर गुन्हा दाखल केला आहे. वास्तविक, महुआ मोइत्रा यांच्यावर सोशल मीडिया पोस्टद्वारे राष्ट्रीय महिला आयोगाच्या अध्यक्षा रेखा शर्मा यांच्यावर अपमानास्पद टिप्पणी केल्याचा आरोप आहे.

यावर तीव्र आक्षेप घेत राष्ट्रीय महिला आयोगाच्या प्रमुखांनी लोकसभा अध्यक्ष ओम बिर्ला आणि दिल्लीचे पोलीस आयुक्त संजय अरोरा यांना पत्र लिहिले होते.

या प्रकरणी रेखा शर्मा यांनी पोलिसांच्या विशेष शाखेकडे तक्रार केल्यानंतर पोलिसांनी भारतीय न्याय संहितेअंतर्गत (बीएनएस) मोईत्रा यांच्यावर गुन्हा दाखल केला.

मोईत्रा यांनी ‘एक्स’च्या माध्यमातून रेखा शर्मा यांच्याविरोधात वक्तव्य केले होते. मोईत्रा यांनी केलेल्या पोस्ट संदर्भातील सविस्तर माहिती पोलिसांनी ‘एक्स’ कडून मागवली आहे.

मोईत्रा यांच्याविरोधात भारतीय न्याय संहितेच्या कलम ७९ अंतर्गत गुन्हा दाखल करण्यात आला आहे. महिलांचा अपमान करण्याच्या उद्देशाने शब्द उच्चारणे अथवा खाणाखुणा करणे यासाठी हे कलम लावले जाते.

उत्तर प्रदेशातील हाथरस येथे झालेल्या चेंगराचेंगरीच्या घटनेनंतर रेखा शर्मा यांनी हाथरसचा दौरा केला होता. त्यांच्या या दौऱ्यासंदर्भात प्रसार माध्यमांशी बोलताना मोईत्रा यांनी वादग्रस्त टिपणी केली होती.

मोईत्रा यांच्यावर त्यानंतर भाजपने टीका केली होती. राष्ट्रीय महिला आयोगाने देखील मोईत्रा यांचे विधान धक्कादायक असल्याचे सांगत त्यांच्यावर कारवाई करण्याची मागणी पोलिसांकडे केली होती.