गुजरात : गुजरातमधील (Gujrat) वडोदरा शहरातील हरणी भागात एका सॉ मिलला (Saw mill) मोठी आग लागली असून ही आग जवळच्या दोन मिलमध्येही पसरलीय. दरम्यान, वडोदरा अग्निशमन आणि आपत्कालीन व्यवस्थापनानं (VFES) आग विझवण्यासाठी शहरातील सहा अग्निशमन केंद्रांमधून 16 अग्निशमन दलाच्या गाड्या आणि 40 अग्निशमन दलाचे कर्मचारी पाठवले आहेत. यात कोणतीही जीवितहानी झाली नसून आगीच्या कारणाचा तपास सुरू करण्यात आलाय.

सोमवारी रात्री 9.30 च्या सुमारास हरणी येथील व्हीएफईएस अग्निशमन केंद्राला जलाराम टिंबर मार्टच्या आवारात आग लागल्याची माहिती मिळाली. आगीची तीव्रता पाहून व्हीएफईएसनं शहरातील विविध अग्निशमन केंद्रातून दहा अग्निशमन दल रवाना केले. तसेच शहरातील सर्व अग्निशमन केंद्रांना सतर्कतेचा इशारा देण्यात आलाय.

वडोदरातील गोदाम प्रामुख्यानं प्लायवूडनं बनवलेलं होतं, त्यामुळेच आग झपाट्यानं पसरली. बाजूच्या इतर दोन लाकडी गोदामालाही आग लागलीय. मात्र, यात कोणतीही जीवितहानी झाली नसली, तरी दाट लोकवस्तीच्या भागात सतर्कतेचा इशारा देण्यात आलाय. तसेच खबरदारी म्हणून काही घरं रिकामी करण्यात आली आहेत.