कोलकाता : पश्चिम बंगालमध्ये चार जागांच्या पोटनिवडणुकीसाठी मतमोजणी सुरु आहे. या निवडणुकीत तृणमूल काँग्रेस पक्षानं सर्व चार जागांवर विजय मिळवला असल्याचं मुख्यमंत्री आणि तृणमूलच्या प्रमुख ममता बॅनर्जी यांनी जाहीर केलं आहे. दिनहाटा, शांतीपूर, गोसाबा आणि खरदा या चार जागांवर पोटनिवडणूक पार पडली होती.

देशातील १४ राज्यांमधील ३ लोकसभा आणि २९ विधानसभेच्या जागांसाठी झालेल्या पोटनिवडणुकीसाठी आज मतमोजणी होत आहे. आत्तापर्यंतच्या ताज्या कलांनुसार, मध्य प्रदेश, आसाम तेलंगाणा येथे भाजप आघाडीवर आहे. तर हिमाचल प्रदेश आणि राजस्थानात काँग्रेसला बढत मिळाली आहे. तर पश्चिम बंगालमध्ये चार जागांवर तृणमूल काँग्रेस आघाडीवर आहे. या जागांवर विजय मिळवल्याचं तृणमूलनं जाहीर केलेलं असलं तरी अद्याप निवडणूक आयोगानं याची अधिकृत घोषणा केलेली नाही.

दरम्यान, तृणमूलचे खासदार देरेक ओबरिअन यांनी दुपारी एक वाजण्याच्या सुमारास ट्विट केलं असून यामध्ये तृणमूल काँग्रेसनं ४ जागांवर मोठा विजय मिळवल्याचं जाहीर केलं. यामध्ये त्यांनी म्हटलं की, या चारही जागांसाठी तृणमूल पहिल्या क्रमांकावर तर दुसऱ्या आणि तिसऱ्या जागांवर भाजप आणि सीपीआयएम आहे. भाजपनं गृहराज्यमंत्र्यांची जागा गमावली आहे. दिनहाटा येथे पक्षानं दीड लाखांचा लीड मिळवला आहे. आता अमित शहा पुढच्या दिवाळीपर्यंत बंगालला येणार नाहीत, असा टोलाही त्यांनी लगावला आहे.