पत्नीने रात्रीच्या जेवणासाठी भात केला नाही म्हणून पतीने तिची हत्या केल्याचा धक्कादायक प्रकार समोर आला आहे. या प्रकरणी ओडिशातील संबलपूर जिल्ह्यात पोलिसांनी एका व्यक्तीला अटक केली. या व्यक्तीने त्याच्या पत्नीची हत्या केल्याचा आरोप आहे.

पोलिसांचे म्हणणे आहे की, महिलेने जेवणासाठी भात शिजवला नाही म्हणून आरोपी इतका संतापला की त्याने पत्नीची हत्या केली. पोलिसांनी आरोपीला अटक करून त्याची कारागृहात रवानगी केली आहे.

काय प्रकरण आहे

घटना संबलपूर येथील जामनकिरा पोलीस स्टेशन हद्दीतील नुआधी गावातील आहे. दरम्यान घटनेबद्दल मिळालेल्या माहितीनुसार, 40 वर्षीय सनातन धारुआ रविवारी रात्री घरी पोहोचला आणि त्याने पाहिले की त्याची पत्नी पुष्पा धारुआ (35 वर्षीय) हिने जेवणासाठी भाजी तयार केली होती, परंतु भात शिजवला नव्हता. यावरून पती-पत्नीमध्ये वाद सुरू झाला आणि वाद इतका वाढला की संतापलेल्या सनातनने पत्नी पुष्पाची हत्या केली.

या जोडप्याला दोन अपत्य आहेत ज्यामध्ये एक मुलगी आणि एक मुलगा आहे. मुलगी हाऊस क्लिनरचे काम करते, त्यामुळे घटनेच्या वेळी ती कामावर गेली होती. तर मुलागा त्याच्या मित्राकडे गेला होता. घरी परतल्यावर आईला जमिनीवर मृतावस्थेत पडलेले पाहून त्याने याबद्दल पोलिसांना माहिती दिली. माहिती मिळताच पोलिसांनी घटनास्थळ गाठून मृतदेह शवविच्छेदनासाठी पाठवला आणि आरोपी पतीला अटक करून कारागृहात पाठवले.