मणिपूरमध्ये माणूसकीला काळीमा फासणारी एक घटना समोर आली होती. मे महिन्याच्या सुरुवातीला काही महिलांना विवस्त्र करून त्यांची धिंड काढण्यात आली होती. या घटनेचा व्हिडिओ बुधवारी व्हायरल झाला होता. देशभरातून या आरोपींवर कारवाई करण्याची मागणी करण्यात आली होती. यानंतर आता पोलिसांनी या प्रकरणातील एका आरोपीला अटक केल्याची माहिती दिली आहे.

हेरादास (वय ३२) असं या आरोपीचं नाव आहे. मणिपूरमधील थौबल जिल्ह्यातून त्याला अटक करण्यात आली. व्हायरल झालेल्या व्हिडिओमध्ये तो हिरव्या रंगाच्या शर्टमध्ये दिसत आहे, असं पोलिसांनी सांगितलं. इंडिया टुडेने याबाबतचं वृत्त प्रसिद्ध केलं आहे. मणिपूरमध्ये गेल्या दोन-अडीच महिन्यांपासून सुरू असलेल्या हिंसाचारामुळे तणावाचे वातावरण आहे.

पोलिसांनी हा व्हिडिओ व्हायरल झाल्यानंतर आरोपींना पकडण्यासाठी १२ पथके तयार केली होती. याप्रकरणी अज्ञात व्यक्तींविरोधात अपहरण, सामूहिक बलात्कार आणि हत्येचा गुन्हा दाखल करण्यात आला होता. (Manipur Viral Video)

सर्वोच्च न्यायालयाची प्रतिक्रिया

या व्हिडिओवरुन देशभरात सध्या संतापाची लाट उसळली आहे. सर्वोच्च न्यायालयाचे सरन्यायाधीश डी. वाय. चंद्रचूड यांनी याबाबत गुरुवारी केंद्र आणि राज्य सरकारला फटकारले.

पंतप्रधान मोदींचे आदेश

दरम्यान, या घटनेबाबत पंतप्रधान मोदींनी दुःख व्यक्त केले. संसदेचे पावसाळी अधिवेशन सुरू होण्यापूर्वी त्यांनी माध्यमांशी याबाबत संवाद साधला. दोषींवर कठोर कारवाई करण्याचे आदेश आपण मणिपूरच्या मुख्यमंत्र्यांना दिल्याचं मोदींनी यावेळी स्पष्ट केलं.