नवी दिल्ली : आम आदमी पक्षाचे राज्यसभेसाठीचे उमेदवार नारायणदास गुप्ता यांच्याकडे लाभाचे पद असल्याने त्यांचा उमेदवारी अर्ज फेटाळण्यात यावा, अशी आग्रही मागणी दिल्ली काँग्रेसने निवडणूक आयोगाकडे केली आहे.

गुप्ता यांच्या उमेदवारी अर्जाच्या पडताळणीवरच काँग्रेसने आक्षेप घेतला असून, अजय माकन यांच्या नेतृत्वाखालील काँग्रेसच्या एका प्रतिनिधी मंडळाने आज दिल्लीत निवडणूक आयोगाच्या अधिकाऱ्यांची भेट घेतली.

गुप्ता हे राष्ट्रीय निवृत्तिवेतन योजनेचे विश्‍वस्त (एनपीएस) असून, राज्यघटनेनुसार हे पद लाभाचे आहे, असा दावा माकन यांनी केला. लोकप्रतिनिधी कायद्याच्या कलम 36 अन्वये गुप्ता यांचा उमेदवारी अर्ज फेटाळण्यात यावा असे त्यांनी म्हटले आहे. गुप्ता यांची 30 मार्च 2015 रोजी "एनपीएस'च्या विश्‍वस्तपदी नियुक्ती करण्यात आली होती. ते अद्याप देखील त्याच पदावर कायम असल्याचे काँग्रेसने म्हटले आहे. 

भाजप कनेक्‍शनवर टीका 
गुप्ता यांच्या भाजप कनेक्‍शनवरही माकन यांनी टीका केली आहे. गुप्ता हे भाजपचे छुपे समर्थक असून, ते अर्थमंत्री अरुण जेटली यांचे निकटवर्तीय असल्यानेच त्यांना उमेदवारी देण्यात आली असल्याचा आरोप त्यांनी केला आहे. तत्पूर्वी आम आदमी पक्षातील असंतुष्ट नेते कुमार विश्‍वास यांनीदेखील गुप्ता यांच्या उमेदवारीवरून थेट मुख्यमंत्री अरविंद केजरीवाल यांच्यावर टीका केली होती.