गुरुग्राम : हरियानातील गुरुग्राम येथील एका प्रसिद्ध विद्यालयात इयत्ता सातवीमध्ये शिकणाऱ्या एका विद्यार्थ्याने त्याच्या वर्गशिक्षिका आणि तिच्या मुलीला बलात्काराची धमकी दिली आहे. संबंधित शिक्षिकेची मुलगी आणि संबंधित विद्यार्थ्यी हे दोघे एकाच वर्गात शिक्षण घेत आहेत. या गंभीर अशा प्रकाराने शिक्षण क्षेत्रात खळबळ उडाली आहे.

गुरुग्राम येथील एका नामांकित विद्यालयात हा प्रकार घडला. या अशा अनपेक्षित प्रकारामुळे संबंधित शिक्षिका आणि तिची मुलगी चांगलेच भयभीत झाले आहेत. या घटनेनंतर दैनंदिन कामासाठी शिक्षिका विद्यालयात येत आहे. मात्र, त्यांची मुलगी शाळेत पुन्हा येण्यास घाबरत आहे. दरम्यान, दुसरीकडे अशाच प्रकारची घटना घडली. यामध्ये आठवीमध्ये शिकणाऱ्या एका विद्यार्थ्याने त्याच्या वर्गशिक्षिकेस कँडललाईट डिनरचा प्रस्ताव दिला. त्याचा हा प्रस्ताव इथेच थांबला नाही, तर त्याने त्यानंतर सेक्ससाठी विचारणाही केली. याबाबतचा ईमेलच त्याने संबंधित शिक्षिकेला केला. 

''याप्रकारानंतर शाळेला आणि संबंधित विद्यार्थ्यांना नोटीस पाठवण्यात आली आहे. त्यांना पुढील चौकशीसाठी बोलवण्यात येणार आहे. त्यांच्यावर शाळा प्रशासनाकडून शिक्षिका, मुलांवर समुपदेशन केले जाणार आहे'', असे बाल कल्याण समितीच्या अध्यक्षा शकुंतला धुल्ल यांनी सांगितले.  

दरम्यान, या दोन्ही प्रकारामुळे शाळा व्यवस्थापनाने यावर कडक पावले उचलली असून, याबाबत चौकशीचे आदेश दिले आहेत. यातील दोषींवर शाळा प्रशासनाकडून कारवाई केली जाणार असल्याचे सांगण्यात आले आहे.