मुंबई : 'पद्मावती' या चित्रपटाला झालेल्या विरोधानंतर आज अखेर चित्रपटाचे प्रदर्शन पुढे ढकलण्यात आले आहे. 'पद्मावती' प्रदर्शित करण्याची तारीख पुढे ढकलण्यात आली असून, चित्रपट प्रदर्शनाची पुढील तारीख लवकरच जाहीर केली जाणार असल्याचे निर्माते व्हायाकॉम 18 यांनी आपल्या प्रसिद्धीपत्रकात म्हटले आहे. आपण स्वेच्छेने चित्रपटाचे प्रदर्शन पुढे ढकलत असल्याचेही ते म्हणाले. 

दीपिका पदुकोन, रणवीरसिंग आणि शाहिद कपूर यांची प्रमुख भूमिका असलेला 'पद्मावती' हा चित्रपट 1 डिसेंबरला प्रदर्शित होणार होता. मात्र, या चित्रपटात राणी पद्मिनी आणि मुघल शासक सम्राट अलाउद्दीन खिलजी यांच्यातील संबंध चुकीच्या पद्धतीने दाखवण्यात आल्याने विविध राजपूत संघटनांनी यावर तीव्र आक्षेप घेत निषेध केला होता. त्यामुळे चित्रपट पद्मावती वादाच्या भोवऱ्यात सापडला होता. याशिवाय चित्रपटासाठी सेन्सॉर बोर्डकडून प्रमाणपत्रही मिळाले नव्हते. तसेच चित्रपटाचे मीडिया स्क्रीनिंग केल्यामुळे सेन्सॉर बोर्डाचे अध्यक्ष प्रसून जोशी याबाबत नाराज होते. 

दरम्यान, या सर्व घडामोडींनंतर अखेर या चित्रपटाचे प्रदर्शन पुढे ढकलण्यात आले आहे. मात्र, या चित्रपटाच्या प्रदर्शनाची पुढील तारीख अद्याप जाहीर करण्यात आलेली नाही.