नवी दिल्ली : उत्तर प्रदेश राज्यातील स्थानिक स्वराज्य संस्थांच्या मतमोजणीला सकाळी सुरवात झाली असून, सत्ताधारी भाजप सध्या आघाडीवर आहे. या निकालानंतर मुख्यमंत्री योगी आदित्यनाथ यांच्या नऊ महिन्यांच्या कामगिरीचे चित्र आता स्पष्ट होणार आहे. गुजरात विधानसभा निवडणुकांच्या पार्श्वभूमीवर या निवडणुकांचे निकाल महत्वाचे मानले जात आहेत. 

उत्तर प्रदेश स्थानिक स्वराज्य संस्थांचे मतदान 22, 26 आणि 29 नोव्हेंबर या कालावधीत तीन टप्प्यांत घेण्यात आले होते. हे मतदान राज्यातील 36,269 मतदान केंद्रात पार पडले. राज्यातील 3.36 कोटी मतदारांनी मतदानाचा हक्क बजावला असून, राज्यात 52.4 टक्के इतके मतदान झाले. राज्यातील 79,113 उमेदवारांचे भवितव्य मतपेटीत कैद झाले आहे. या निवडणुकांच्या प्रचारासाठी योगी आदित्यनाथ यांनी 16 हून अधिक ठिकाणी प्रचारसभा घेतल्या होत्या.

आज या निवडणुकीच्या मतमोजणीला सकाळीपासून सुरवात झाली आहे. सहारनपूर भागात बहुजन समाजवादी पक्षाचे महापौरपदाचे उमेदवार फझल उर रेहमान यांनी तिसऱ्या फेरीत 17,333 मतांनी आघाडी घेतली आहे. तर भाजपच्या संजीव वालिया यांना 12,787 मते मिळाली आहेत. तसेच काँग्रेसचे शशी वालिया यांना 6,117 मते मिळाली आहेत.

याशिवाय मोरादाबादमध्ये भाजपचे महापौरपदाचे उमेदवाराने 6,000 मतांची आघाडी घेतली आहे. मथुरामध्ये काँग्रेस, फिरोजाबादमध्ये बसपा तर आग्रामध्ये भाजप सध्या आघाडीवर आहे.