आग्रा : भारतात राहणारी प्रत्येक व्यक्ती आपल्या देशाचे राष्ट्रगीत, वंदे मातरम् आणि राष्ट्रध्वज अभिमानाने उंचावतो. मात्र, असे करणे एका मुस्लिम व्यक्तीला चांगलेच महागात पडले आहे. 'वंदे मातरम्' हे गीत गायल्याने मौलानांकडून त्याला समाजातून बहिष्कृत करण्यात आले आहे. याप्रकारानंतर प्रचंड संताप व्यक्त केला जात आहे. 

आग्रा येथे राहणाऱ्या 36 वर्षीय गुलचमन शेरवानी यांनी तिरंगा असलेले कपडे परिधान करतात. तसेच त्यांची मुले 'वंदे मातरम्' हे गीत अनेकदा गातात. त्यामुळे येथील समाजाने याला विरोध केला. याशिवाय दिल्लीतील जामा मस्जिदच्या इमाम मौलाना अहमद बुखारी यांनी त्यांच्याविरोधात फतवाही जारी केला आहे. शेरवानी यांना हा फतवा मिळाल्यानंतरही त्यांनी वंदे मातरम् गाण्याचे सोडले नाही. त्यामुळे त्यांना समाजातून बहिष्कृत करण्यात आले आहे. तसेच त्यांच्या मुलांनाही शाळेतून काढून टाकण्यात आले आहे. 

''शेरवानी यांच्या मुलांनी गेल्या वर्षी शाळेत प्रवेश घेतला होता. त्यांची मुले वंदे मातरम् गात होती. त्यामुळे दुसऱ्या समुदायाकडून याला विरोध केला जात होता. याविरोधातून शाळा सोडण्यासाठी त्यांच्या मुलांवर दबाव टाकण्यात येत होता. त्यामुळे त्यांना शाळेतून काढून टाकण्यात आले. त्यांना शाळेतून काढले नसते तर इतर विद्यार्थी शाळा सोडून गेले असते. त्यामुळे हा निर्णय घेण्यात आला", असे शाळा व्यवस्थापनाने सांगितले. 

''माझ्या एका मुलाचा जन्म 15 ऑगस्ट तर दुसऱ्याचा जन्म 26 जानेवारीला झाला. त्यावरून माझे देशावरील प्रेम जाहीर होत आहे. तसेच माझ्या विवाहाप्रसंगी 'वंदे मातरम्' लावण्यात आले होते आणि त्यावरच लोकांनी नृत्य केले होते'', असे गुलचमन शेरवानी यांनी सांगितले.