MCD Elections: भाजपचे अध्यक्ष जेपी नड्डा यांनी रविवारी आरोप केला आहे की, देश प्रगतीच्या मार्गावर पुढे जात आहे, मात्र आम आदमी पक्षाचे सरकार सर्वसामान्यांच्या हिताच्या विरोधात काम करत असल्याने दिल्लीत विकास होत नाही. नड्डा यांनी रविवारी दिल्लीच्या वजीरपूर भागात महापालिका निवडणुकीत भाजपच्या उमेदवाराचा घरोघरी प्रचार केला.

भाजपच्या प्रचाराचा एक भाग म्हणून, नड्डा यांनी स्थानिक लोकांशी संवाद साधला आणि पक्षाच्या जाहिरनाम्याच्या प्रती दिल्या. आप नेते आणि दिल्लीचे मंत्री सत्येंद्र जैन यांना तिहार तुरुंगात व्हीआयपी ट्रीटमेंट मिळाल्याच्या वादावरून नड्डा यांनी अरविंद केजरीवाल सरकारवर निशाणा साधला. जैन तिहार तुरुंगात मसाज घेत असल्याच्या कथित व्हिडिओचा संदर्भ देत ते म्हणाले की, "त्यांनी आरोग्य क्षेत्रात चांगले काम केले आहे आणि तिहारमध्ये मसाज सेंटर उघडले आहे"

आपचे नेते आणि उपमुख्यमंत्री मनीष सिसोदिया यांनी जैन यांच्या बचावासाठी पत्रकार परिषद घेवून सांगितल की जैन यांना पाठीच्या कण्याला दुखापत झाल्यामुळे तुरुंगात फिजिओथेरपिस्टकडून उपचार केले जात आहेत. सिसोदिया यांच्या या प्रतिक्रियेवर नड्डा म्हणाले, "त्यांनी शिक्षण क्षेत्रातही चांगले काम केले आहे आणि बलात्कार करणाऱ्याला थेरपिस्ट बनवले आहे."