नवी दिल्ली : कर्नाटक उच्च न्यायालयाने हिजाब वादावर निकाल (Karnataka High Court Hijab Row Judgement) दिला आहे. शैक्षणिक संस्थांमध्ये हिजाबबंदी योग्यच आहे, असं मत न्यायालयानं मांडलं असून याविरोधातील याचिका फेटाळल्या आहेत. त्यावरून मेहबूबा मुफ्ती (Mehbooba Mufti) यांनी नाराजी व्यक्त केली आहे. हा निर्णय निराशाजनक असल्याचं मुफ्ती म्हणाल्या.

शाळा-महाविद्यालयात हिजाब बंदी कायम ठेवण्याचा कर्नाटक उच्च न्यायालयाचा निर्णय अत्यंत निराशाजनक आहे. एकीकडे आपण महिलांच्या सक्षमीकरणाविषयी बोलतो तरीही आपण त्यांना साध्या आवडी-निवडीचा अधिकार नाकारत आहोत. हे केवळ धर्माविषयी नाही तर निवडीचे स्वातंत्र्य आहे, असं मेहबुबा मुफ्ती म्हणाल्या.

काही दिवसांपूर्वी कर्नाटकमधील उडपी येथे हिजाब घातलेल्या विद्यार्थिनींना महाविद्यालयाने प्रवेश नाकारला होता. त्यानंतर या विद्यार्थिनींनी शिक्षण विभागाकडे तक्रार केली होती. पण, शाळा-महाविद्यालयांमध्ये गणवेशातच यावे, असं सरकारनं सांगितलं होतं. त्यानंतर विद्यार्थिनींनी न्यायालयात धाव घेतली. हिजाब वादाचं लोण हळूहळू उडपीच्या आजूबाजूच्या जिल्ह्यात देखील पसरलं होतं. मुली हिजाब घालून आल्या तर आम्ही भगवे शेले घेऊन येऊ अशा भूमिका काही हिंदूत्ववादी विद्यार्थ्यांनी घेतली होती. कर्नाटकमध्ये आंदोलन देखील करण्यात आले. भगवे शेले घातलेल्या विद्यार्थ्यांनी एका हिजाब घातलेल्या मुलीला घेराव घालून ''जय श्री राम''च्या घोषणा दिल्या होत्या, तर त्या विद्यार्थिनीनं ''अल्लाह हू अकबर'' म्हणत त्यांना उत्तर दिलं. त्यानंतर हे प्रकरण चांगलंच चिघळलं. आता न्यायालयानं निकाल दिला असून शैक्षणिक संस्थांमध्ये हिजाब बंदी योग्यच आहे, असं म्हटलं आहे.