श्रीनगर - तालिबानच्या निमित्ताने जम्मू-काश्‍मीरच्या माजी मुख्यमंत्री मेहबूबा मुफ्ती यांनी पुन्हा केंद्र सरकारवर निशाणा साधला आहे. ‘‘ तालिबानमुळे अमेरिकेला अफगाणिस्तान सोडावे लागले. आमच्याही सहनशीलतेचा अंत पाहू नका. ज्या दिवशी आमचा संयम सुटेल त्या दिवशी तुम्ही देखील राहणार नाहीत.’’ अशी खुली धमकीच मेहबूबा यांनी दिल्याने नव्या वादाला तोंड फुटले आहे.

‘‘ काश्‍मीर खोऱ्यामध्ये पुन्हा शांतता निर्माण करायची असेल तर येथे नव्याने ३७० वे कलम येथे लागू केले जावे. चर्चेच्या माध्यमातून काश्‍मीर प्रश्‍नावर तोडगा काढण्यात यावा. तालिबान्यांमुळे अमेरिकेला अफगाणिस्तान सोडावे लागले, शेजाऱ्यांकडे पाहून केंद्र सरकारने वेळीच सावध व्हावे. सध्या जगाचे लक्ष तालिबानकडे लागले आहे. यानिमित्ताने मी देखील तालिबानी नेतृत्वाला जग तुमच्या विरोधात जाईल असे कोणतेही कृत्य करू नका असे आवाहन करत आहे.’’ असे मेहबूबा म्हणाल्या.

तर काश्‍मीर भारतात नसते

तत्कालीन पंतप्रधान पंडित जवाहरलाल नेहरू यांनी १९४७ साली या राज्याचे वेगळेपण कायम ठेवण्याचे आश्‍वासन दिले होते. स्वातंत्र्याच्या वेळी भाजप जर सत्तेत असता तर आज हे राज्य भारताचा भाग राहिला नसते असेही मेहबूबा यांनी स्पष्ट केले. काश्‍मीरमधील असंतोष दडपण्यासाठी सरकार केंद्रीय यंत्रणांचा दुरुपयोग करत आहे. भाजपची मंडळी सुधारली नाही तर देशाचे विभाजन अटळ आहे असेही त्या म्हणाल्या.

मेहबूबा मुफ्ती यांनी अशा प्रकारची विधाने करू नयेत. जम्मू-काश्‍मीर हा भारताचा अविभाज्य भाग आहे. -निर्मला सीतारामन, अर्थमंत्री

मेहबूबा यांना काश्‍मीरमध्ये तालिबान्यांची राजवट यावी असे वाटते पण आमचे सरकार या दहशतवाद्यांचा सफाया करेल. - रवींद्र रैना, नेते भाजप