भिंड/ग्वाल्हेर : भारतीय हवाई दल (आयएएफ) हे अनेक अत्याधुनिक लढाऊ विमानांनी सुसज्ज आहे. मिग, सुखोई, मिराग, तेजस, बोईंग, जॅग्वार यांचा समावेश आयएएफच्या ताफ्यात आहे. मात्र, मिग-21 चे अपघात होण्याचे प्रकार वारंवार घडत असल्याचे आपण पाहतो. 

भारतीय हवाई दलाचे 'मिग 21' हे प्रशिक्षणासाठी वापरण्यात येणारे विमान मध्य प्रदेशमधील भिंड जिल्ह्यात कोसळले. दोन्ही वैमानिक विमानातून सुखरूप बाहेर पडले असून, त्यांना रुग्णालयात दाखल करण्यात आले आहे. 

'मिग 21' या विमानाने नेहमीच्या प्रशिक्षणासाठी बुधवारी (ता.25) सकाळी दहा वाजता हवाई दलाच्या ग्वाल्हेर तळावरून उड्‌डाण केले होते. धावपट्टीवर उतरण्याआधी 6 नॉटिकल अंतरावर असताना विमान कोसळले. यानंतर विमानाला आग लागली, पण सुदैवाने दोन्ही वैमानिक यातून सुखरूप बाहेर पडले.

हवाई दलाचे मदत पथक हेलिकॉप्टरने तातडीने घटनास्थळी पोचल्यानंतर वैमानिकांना तेथून हलविण्यात आले. अपघाताची कारणे शोधण्यासाठी चौकशीचे आदेश देण्यात आले आहेत, असे हवाई दलातर्फे सांगण्यात आले.