नवी दिल्ली

केंद्रीय अर्थराज्य मंत्री आणि भाजपा खासदार अनुराग ठाकूर टेरिटोरियल आर्मीमध्ये कॅप्टन बनले आहेत. २०१६ मध्ये टेरिटोरियल आर्मीमध्ये लेफ्टनंट झालेल्या ठाकूर यांना आता कॅप्टनपदाचा बहुमान देण्यात आला आहे. अनुराग ठाकूर असे पहिले खासदार आणि मंत्री आहेत ज्यांना हा बहुमान मिळाला आहे. 

माजी लष्करप्रमुख जनरल सुहाग यांनी २०१६ मध्ये अनुराग ठाकूर यांना टेरिटोरियल आर्मीमध्ये सामावून घेतलं होतं. भाजपपासून संसदेपर्यंत आणि क्रिकेटच्या राजकारणापासून भाजपच्या स्टार प्रचारकापर्यंत आपला ठसा उमटवणारे अनुराग ठाकूर हिमाचल प्रदेशचे माजी मुख्यमंत्री प्रेमकुमार धूमल यांचे पुत्र आहेत. भाजपच्या तरुण पिढीतील ते एक महत्वाचे नेते आहेत. 

भाजपच्या राजकारणातच नव्हे तर क्रिकेटच्या राजकारणातही अनुराग ठाकूर महत्वाची भूमिका बजावत आहेत. मे २०१६ ते फेब्रुवारी २०१७ पर्यंत त्यांनी बीसीसीआयचे अध्यक्षपद भूषवले आहे. मात्र, एक खेळाडू म्हणून त्यांनी प्रथम श्रेणी क्रिकेटमधील एकच सामना खेळला आहे. त्यातही ते शून्यावर आऊट झाले होते. तरीही हिमाचल प्रदेशच्या राज्य क्रिकेट संघाचे ते सर्वात कमी वयाचे अध्यक्ष बनले नाहीत तर २००१ मध्ये २६ वर्षांच्या वयातच ते सर्वात तरुण राष्ट्रीय निवड समितीत सदस्यही बनले. भाजपमध्ये देखील त्यांच्यावर महत्वाची जबाबदारी सोपवण्यात आली आहे. अनुराग ठाकूर हे भाजप युवा मोर्चाचे राष्ट्रीय अध्यक्षही राहिले आहेत.