नवी दिल्ली : इन्कम टॅक्स विभागाच्या ऑनलाइन पोर्टलमध्ये वारंवार अडचणी येत आहेत. परंतू हे पोर्टल तयार केलेल्या 'इन्फोसिस' ही आयटी कंपनी यातील अडचणी अद्याप सोडवू शकलेलं नाही. त्यामुळे केंद्रीय अर्थमंत्रालयानं इन्फोसिसचे सीईओ आणि एमडी सलिल पारेख यांना समन्स बजावलं आहे.

या समन्समध्ये म्हटलंय की, "इन्कम टॅक्सच्या पोर्टलला लॉन्च होऊन दोन महिने झाले तरी अद्याप यातील अडचणी दूर का झालेल्या नाहीत? याबाबत सलील पारेख यांनी अर्थमंत्री निर्मला सीतारामन यांना स्पष्टीकरण द्यावं."

इन्कम टॅक्सचं नवीन ई-फाईलिंग पोर्टल www.incometax.gov.in मोठा गाजावाजा करत ७ जून रोजी लॉन्च करण्यात आलं होतं. पण आता दोन महिने झाले तरी ते सुरळीतपणे चालत नाही. त्यात अद्यापही अडचणी येत आहेत.

"या पार्श्वभूमीवर इन्फोसिसच्या सीईओ-एमडी सलील पारेख यांना समन्स पाठवण्यात आलं असून २३ ऑगस्ट रोजी याबाबत खुद्द अर्थमंत्र्यांसमोर त्यांना स्पष्टीकरण देण्यास सांगितलं आहे. २१ ऑगस्टपासून तर हे पोर्टल पूर्णपणे ठप्पच आहे." अशा आशयाचं ट्विट स्वतः इन्कम टॅक्स विभागाकडून करण्यात आलं आहे.