नवी दिल्ली : चीनने भारतीय तरुणाचे अरुणाचल प्रदेशातून अपहरण केल्याचा (China Abducted Arunachal Pradesh Boy)दावा एका खासदाराने केला होता. या प्रदेशातील सियांगा जिल्ह्यातील १७ वर्षांचा हा तरुण असल्याचं या खासदारांनी म्हटलं आहे. याबाबत तेजपूर संरक्षण क्षेत्राचे पीआरओ लेफ्टनंट कर्नल हर्षवर्धन पांडे यांनी महत्वाची माहिती दिली आहे.

अरुणाचल प्रदेशातील सियांग जिल्ह्यातील १७ वर्षांच्या तरुणाचं चीनने अपहरण केल्याचं ट्विट खासदार तापिर गाओ यांनी केलं होतं. त्यानंतर विरोधकांनी देखील मोदी सरकारवर टीका केली होती. त्याबाबत आता पीआरओ लेफ्टनंट कर्नल हर्षवर्धन पांडेंनी सांगितलं की, ''एक बेपत्ता झालेला मुलगा सापडल्याचं चीनी सैन्यानं आम्हाला कळवलं आहे. त्याला परत आणण्याची प्रक्रिया सुरू आहे.''

मिराम टॅरन तरुणाचं नाव -

चिनच्या पिपल्स लिबरेशन आर्मीने अरुणाचलच्या सियांग जिल्ह्यातील भारतीय हद्दीतून तरुणाचे अपहऱण केले आहे. तिथले भाजप खासदार तापिर गाओ यांनी बुधवारी ही धक्कादायक अशी माहिती दिली. मिराम टॅरन असं त्या तरुणाचं नाव असल्याचंही पीटीआयनं म्हटलं होतं.

खासदार तापिर गाओ यांचं म्हणणं काय? -

''चीनी सैन्याच्या कैदेतून सुटलेल्या दुसऱ्या एका मुलाने या अपहरणाची माहिती अधिकाऱ्यांना दिली आहे. चीनी सैन्याने केलेल्या अपहरणाबाबत केंद्रीय गृहमंत्रालयाला माहिती देण्यात आली असल्याचंही त्यांनी सांगितलं होतं. तसंच सरकारी संस्थांकडून भारतीय तरुणाच्या सुटकेसाठी प्रयत्न व्हावेत यासाठी विनंतीही केली'' असं खासदार तापिर गाओ म्हणाले होते.