भुवनेश्वर : तब्बल चारवेळा आमदार म्हणून निवडून येणारे आदिवासी नेते मोहनचरण माझी यांनी आज ओडिशाच्या मुख्यमंत्रिपदाची शपथ घेतली. राज्याचे मुख्यमंत्री होणारे ते पहिलेच भाजप नेते ठरले आहेत. या शपथविधी सोहळ्यास पंतप्रधान नरेंद्र मोदी यांच्यासमवेत केंद्रीय मंत्री आणि विविध भाजपशासित राज्यांचे मुख्यमंत्री देखील उपस्थित होते.

येथील जनता मैदानात झालेल्या सोहळ्यात राज्यपाल रघुवरदास यांनी माझी यांना पद आणि गोपनीयतेची शपथ दिली. के.व्ही.सिंह देव, प्रवती परिदा यांनी उपमुख्यमंत्रिपदाची शपथ घेतली.

ओडिशामध्ये सरकार स्थापन करण्याची भाजपची ही पहिलीच वेळ आहे. हा सोहळा भव्यदिव्य ठरावा म्हणून संघटनेकडून प्रयत्न करण्यात आले होते. या सोहळ्याला पंतप्रधान नरेंद्र मोदी यांच्या व्यतिरिक्त जे.पी.नड्डा, अमित शहा, राजनाथसिंह, भूपेंद्र यादव, धर्मेंद्र प्रधान, अश्विनी वैष्णव आणि अन्य नेते मंडळी उपस्थित होती.