नवी दिल्ली : केरळमध्ये मंकीपॉक्सचे (Monkeypox) आणखी एक प्रकरण समोर आले आहे. केरळच्या आरोग्य मंत्री वीणा जॉर्ज यांनी ही माहिती दिली. मलप्पूरममध्ये ३० वर्षीय तरुणावर उपचार सुरू आहे. हा तरुण २७ जुलै रोजी यूएईहून (UAE) कोझिकोड विमानतळावर पोहोचला होता. यानंतर त्याची प्रकृती बिघडली होती. त्याला रुग्णालयात दाखल करण्यात आले आहे. प्राथमिक तपासणीअंती त्याला मंकीपॉक्सची लागण झाल्याचे समजते. देशातील मंकीपॉक्स रुग्णांची संख्या आता सात झाली आहे. (monkeypox Latest News)

केरळमध्ये मंकीपॉक्सच्या लक्षण असलेल्या व्यक्तीचा मृत्यू झाल्याचे समोर आले होते. या युवकाचा मृत्यू झाल्यानंतर काल म्हणजे दोन दिवसांनी त्याचे नमुने मंकीपॉक्स (Monkeypox) पॉझिटिव्ह आले. त्यामुळे चिंता वाढली आहे. या २२ वर्षीय व्यक्तीचा ३० जुलै रोजी मृत्यू झाला होता. तो नुकताच यूएईतून (UAE) परतला होता. या रुग्णाचे नमुने पुण्यातील नॅशनल इन्स्टिट्यूट ऑफ व्हायरोलॉजीमध्ये (NIV) तपासणीसाठी पाठवले होते.

केरळ (Kerala) राज्यात मंकीपॉक्सची लक्षणे असलेल्या व्यक्तीचा मृत्यू झाल्यानंतर काही दिवसांनी केरळमध्ये आणखी एक मंकीपॉक्स प्रकरणाची पुष्टी झाली आहे. यूएईमधून परतलेल्या व्यक्तीची आज सकारात्मक चाचणी झाली. राज्यातील हा विषाणूजन्य आजाराचा आतापर्यंतचा पाचवा रुग्ण आहे. त्याच्यावर मलप्पूरममधील मंजेरी मेडिकल कॉलेजमध्ये उपचार सुरू आहे.

राजधानी दिल्लीत सोमवारी मंकीपॉक्सची दुसरी घटना समोर आली आहे. सूत्रांनी दिलेल्या माहितीनुसार, आफ्रिकन वंशाच्या एका नागरिकाला संसर्ग झाल्याची पुष्टी झाली आहे. त्याला दोन दिवसांपूर्वी संशय आल्याने उपचारासाठी लोकनायक जयप्रकाश रुग्णालयात दाखल करण्यात आले होते. सोमवारी त्याला मंकीपॉक्सची लागण झाल्याची पुष्टी झाली आहे. रविवार व सोमवारी देखील आफ्रिकन वंशाच्या संशयितांना उपचारासाठी रुग्णालयात दाखल करण्यात आले असून, त्यांचा अहवाल येणे बाकी आहे.