मध्य प्रदेशचे मुख्यमंत्री शिवराजसिंह चौहान यांच्या विरोधातील असंतोषाचा फटका आता भाजपला या निवडणुकीत बसण्याची शक्यता दिसून आल्याने केंद्रीय गृहमंत्री अमित शहा यांनी राज्यातील रणनीतीची सूत्रे हातात घेतली आहे. त्यांनी आज ग्वाल्हेरमधील जिल्ह्यातील नेत्यांची बैठक घेऊन प्रचाराची पुढील दिशा कशी राहील, यावर मार्गदर्शन केले.

मध्य प्रदेशमध्ये मतदान येत्या १७ नोव्हेंबरला असून येथे पहिल्यांदाच भाजपला एवढ्या मोठ्या असंतोषाला भाजपला सामोरे जावे लागत आहे. ग्वाल्हेर आणि चंबळ या भागात एकूण ३४ विधानसभा मतदारसंघ आहे. या मतदारसंघामध्ये केंद्रीय मंत्री ज्योतिरादित्य शिंदे यांचा प्रभाव असल्याचे मानला जाते.

गेल्या निवडणुकीत या भागात काँग्रेसला २६ जागांवर विजय मिळाला होता. या भागावर प्रभाव असलेल्या ज्योतिरादित्य शिंदे यांनी भाजपमध्ये प्रवेश केल्यानंतरही भाजपची स्थिती येथे फारशी सुधारलेली दिसून आलेली नाही. उलट अनेक मतदारसंघात बंडखोरी झाली आहे. ही बंडखोरी केंद्रीय मंत्री शिंदे यांच्या आवाहनानंतरही संपलेली नाही.

ही स्थिती लक्षात घेऊन केंद्रीय गृहमंत्री अमित शहा यांनी आता जिल्हा पातळीवरील नेत्यांशी चर्चा करून त्यांची नाराजी दूर करण्याचा प्रयत्न केले आहे. पंतप्रधान नरेंद्र मोदी यांच्या नेतृत्वावर विश्वास ठेऊन आपण प्रचारात सहभागी व्हावे, छोटेमोठे मतभेद बाजूला करावे, असे आवाहन केंद्रीय मंत्री शहा कार्यकर्त्यांना करीत आहे.