नवी दिल्ली : मुख्तार अब्बास नक्वी (Mukhtar Abbas Naqvi) यांची पश्चिम बंगालचे (Bengal) राज्यपाल (Governor) म्हणून नियुक्ती केल्याची कोणतीही अधिकृत घोषणा करण्यापूर्वी भाजप खासदार हंसराज हंस यांनी याबाबत ट्विट केले. त्यांनी सर्वप्रथम मुख्तार अब्बास नक्वी यांचे पश्चिम बंगालचे राज्यपाल झाल्याबद्दल अभिनंदन केले. त्यानंतर काही वेळातच ट्विट डिलीट केले. (Mukhtar Abbas Naqvi Latest News)

बंगालचे (Bengal) विद्यमान राज्यपाल (Governor) जगदीप धनखर यांना एनडीएने उपराष्ट्रपतीपदाच्या निवडणुकीसाठी उमेदवार बनवले आहे. अशा स्थितीत पद रिक्त झाल्यानंतर त्यांची जागा कोणालातरी घ्यावी लागणार आहे. अशा परिस्थितीत मुख्तार अब्बास नक्वी यांचे नाव आघाडीवर आहे. यापूर्वी नक्वी (Mukhtar Abbas Naqvi) यांचेही नाव राष्ट्रपतीपदाच्या शर्यतीत होते. परंतु, एनडीएने द्रौपदी मुर्मू यांना उमेदवारी दिली.

‘केंद्र सरकारने मुख्तार अब्बास नक्वी यांची बंगालचे नवीन राज्यपाल म्हणून नियुक्ती केल्याबद्दल अभिनंदन’ असे ट्विट भाजप (BJP) खासदार हंसराज हंस यांनी केले होते. काही वेळातच हंसराज हंस यांनी हे ट्विट डिलीट केले. जगदीप धनखर यांनीही बंगालच्या राज्यपालपदाचा राजीनामा दिला आहे. हा राजीनामाही स्वीकारण्यात आला आहे. मणिपूरचे राज्यपाल ला गणेशन यांच्याकडे सध्या बंगालचा अतिरिक्त कार्यभार सोपवण्यात आला आहे.