लखनऊ : बहुजन समाज पक्षाचे खासदार अफजल अन्सारी यांना १६ वर्षे जुन्या गँगस्टर प्रकरणात दोषी ठरवून चार वर्षांची शिक्षा सुनावण्यात आली आहे. यासोबतच एक लाख रुपयांचा दंडही ठोठावण्यात आला आहे. न्यायालयाकडून शिक्षा सुनावण्यासोबतच अफजल अन्सारी यांना कडेकोट बंदोबस्तात तुरुंगात पाठवण्यात आले.

याच प्रकरणात न्यायालयाने माफिया मुख्तार अन्सारीला देखील दहा वर्षांची शिक्षा आणि पाच लाखांचा दंड ठोठावला आहे.

न्यायालयाच्या या निर्णयानंतर अफजल अन्सारीचे लोकसभा सदस्यत्व धोक्यात आले आहे . शिक्षा सुनावताना ते न्यायालयात हजर होते. न्यायालयाकडून दोन वर्षांपेक्षा जास्त शिक्षा झाल्यास आमदार आणि खासदाराचे सदस्यत्व रद्द होऊ शकते. त्याचबरोबर कायद्यानुसार अफजल अन्सारी या निर्णयाविरोधात उच्च न्यायालयात अपील करू शकतात.

२००५ मध्ये गाझीपूरमध्ये तत्कालीन भाजप आमदार कृष्णानंद राय यांच्यासह सात जणांची मुहम्मदाबाद पोलिस स्टेशनच्या बसनिया चट्टी येथे हत्या करण्यात आली होती. या प्रकरणी अफजल अन्सारी आणि मुख्तार अन्सारी यांच्यावर २००७ मध्ये गँगस्टर कायद्यांतर्गत गुन्हा दाखल करण्यात आला होता. तेव्हापासून गाझीपूरचे खासदार अफजल अन्सारी जामिनावर बाहेर होते.