बंगळूर : कर्नाटक दूध महासंघाने (Karnataka Milk Federation) सरकारला नंदिनी दूधाच्या दरात पाच रुपयांनी वाढ करण्याची विनंती केली आहे. केएमएफचे नूतन अध्यक्ष भीमा नाईक म्हणाले, ‘‘शेतकऱ्यांना देण्यात येणाऱ्या सवलतीत वाढ करण्यासाठी हा निर्णय घेतला आहे.

प्रसारमाध्यमांशी बोलताना ते म्हणाले, ‘‘नंदिनी दूध (Nandini Milk) हा राष्ट्रीय ब्रँड आहे. खासगी क्षेत्राला स्पर्धा देण्याची ताकद केएमएफमध्ये आहे. दूध कमी झाले आहे. तुपाचा तुटवडा आहे. दूध दरवाढीबाबत मुख्यमंत्री सिद्धरामय्या यांच्याशी चर्चा करून पुढील निर्णय घेतला जाईल.

कर्नाटक दूध संघाकडून दरवाढीची विनंती यापूर्वीच मिळाली आहे. शेतकऱ्यांना (Farmer) पाच रुपये प्रोत्साहनपर अनुदान दिले जात आहे. त्यात आणखी दोन रुपयांची वाढ करण्याचा विचार आहे. त्यामुळे नंदिनी दुधाच्या दरात प्रतिलिटर पाच रुपये वाढ करण्याची विनंती केली आहे.

मुख्यमंत्री सिद्धरामय्या यांच्यासोबत शेतकऱ्यांच्या हिताबाबत चर्चा होणार आहे. याशिवाय दूध उत्पादक शेतकऱ्यांना अधिक लाभ मिळावा, यासाठी त्या बैठकीत निर्णय घेण्यात येणार आहे. शेतकऱ्यांच्या दुधाच्या खरेदी दरात वाढ करणे गरजेचे आहे. ग्राहकांना दिल्या जाणाऱ्या दुधाच्या दरातही वाढ करणे आवश्यक आहे.

सहकार मंत्री राजण्णा यांनी दूधाच्या दरात वाढ होण्याची शक्यता वर्तवली आहे. केएमएफच्या नंदिनी दूधाचे अमूलमध्ये विलीनीकरण होणार का, या प्रश्नावर मंत्री राजण्णा म्हणाले, ‘‘कोणत्याही विलीनीकरणाचा प्रश्नच येत नाही.